السبت، 12 يوليو، 2008

الوجه الآخـــر للغربه

من شهرين وانا بعاني من آلام شديدة وتقرر إجراء عملية ولكني أجلتها لبعد إنتهاء الأولاد من الإمتحانات ..وأول ما خلصوا إمتحاناتهم سلمت نفسي لمشرط الجراح يقطع زي ما هو عايز يمكن ده يزيل الألم ..طبعا كنت متخوفه من كوني في غربتي وحدي لكني توكلت على الله وعملتها وعندي يقين إن ربنا ما بينساش حد ودايماً معانا ..وفي الحقيقة شفت في محنتي جانب مشرق في الغربه إداني بصيص من نور ...شفت إهتمام ورعاية وحب من كل إللي موجودين في المستشفى إبتداءً من الدكتور إللي عملي العملية ..حقيقي إنسان ذوق ..ذوق ..ذوق ..تتعب من قولت ذوق ..وطبعا الذوق ده كله مصري الصنع ..متابعه باستمرار ..وتعليمات من آن لآخر ..وإطمئنان على حالة الجرح ..وكمان سؤال على الأولاد إللي كانوا لوحدهم في البيت ..لدرجة إنه كان عايز يعملهم صينية مكرونه وكمان بالباشميل..أصله ميعرفش إني أروبه وكنت عامله أكل كتير في الثلاجه ...المهم التصرف نفسه ..حقيقي ذوق ..هما دول ولاد البلد..
وكمان الدكتوره ناديه أخصائية أمراض النسا في المستشفى...ست زي النسمه ..وطيبه كده .. دخلت معايا غرفة العمليات ..أصل أختكم مع إنها دكتوره إلا إنها لحد موضوع العمليات ده وبتبقى جبانه جداً..وفي الحقيقه وجود الدكتوره ناديه طمني كتير ..لكن إللي خلاني مطمنه على الآخر وحاطه في بطني شادر بطيخ صيفي هو وجود أبو البنين معايا....عيني فضلت متسمره عليه لحد ما رحت في سابع نومه....
والدكتوره ياسمين..دكتورة الأسنان إللي زي البسكوته حاجه كده زي القطط ..وهتتجوز قريب جداً ربنا يسعدها..
وكمان ربنا رزقني بممرضه مصريه زي العسل جابت حالها ومحتالها وصممت تفضل معايا طول الليل ...وطبعا كعادة المصريين أكلت وداني رغي وحكايات طول الليل ..نسيتني إني عامله عملية من أصله...حقيقي المصريين دول زي العسل..
أما التمريض بقى فدول فاتنات الفلبين ..كل شويه واحده تقيس الضغط والحراره وتطبطب عليَه بكل رقه وعذوبه ..بصراحه ياريت الممرضات المصريات يتعلموا منهم الرقه دي ..حاجه تخلي الواحد يخف لوحده ..من غير أدوية .
وحتى العاملات كل شويه سؤال إذا كنت محتاجه حاجه..أو نفسي في حاجه ..حقيقي بقيت مش عارفه أعمل معاهم إيه..
وتاني يوم العمليه لقيت طابور من القمرات داخلين عليه..زي دخلت هلال العيد...كلهم لابسين بدل سوداء ..شغلت الفهامه إللي مش بتشتغل كتير.. وعرفت إن دول طبعاً طقم السكرتاريه والحسابات في المستشفى ..ولابسين كده لأن مدير المستشفى ..وهو أبو البنين ..موحد الزي في المستشفى من باب الشياكه.. وعلشان المرضى يعرفوا إن دول موظفات المستشفى ...أما سبب إختياره للون الأسود ده فأنا مش فهماه لحد دلوقت
...يمكن علشان يمنع الألوان والحركات والدندشه الزايده في اللبس..أصله مبيحبش الست في شغلها تزودها في لبسها ..المهم إنهم وهما لابسين الأسود برضوا زي القمر...
ده غير إني إتعرفت على زوجات دكاتره..ستات محترمات ..مكنتش أعرفهم قبل كده.
طبعا هتقولوا يا بخت من كان مدير المستشفى جوزه ..لكن في الحقيقه ...أنا عندي ميزه... إني بعرف أفرق بين الإنسان إللي بيعمل الحاجه مجامله وإللي بيعملها عن حب ..أكيد بيحبوا مديرهم أبو البنين ..وأكيد كمان بيحبوني ..وإلا مكنش حد عبرني ولا بص في خلقتي ..وخاصة الدكتوره ناديه إللي بتربطني بيها علاقه طيبه من ثلاث سنين..
وبالليل جالي حبايبي زياد وعاصم ..وهاتك يا أحضان وبوس وكلام مش عارفه العيال دول جابوه منين..طالعين لأبوهم..
وحشتينا ياماما ..البيت وحش من غيرك يا ماما..إنت كويسه ..طمنينا عليك..إحنا مكلناش أكلنا علشان مكنش عندنا نفس ناكل وإنت مش موجوده ..
طيب قولولي أعمل إيه بعد الكلام ده ..طبعاً كالعاده..دموع... دموع..معنديش غيرها..
أما بقى أبو البنين ..فحقيقي مش عارفه أعمل معاه إيه ...كل المستشفى ..فتنوا عليه وقالولي على حالة التوتر الفظيع إللي كان فيها وأنا في غرفة العمليات..ولو إني متأكده من الموضوع ده ومش محتاجه حد يفتن عليه ...وغير تعبه مع الأولاد في عمايل السندويتشات إللي الأولاد حبوها جداً لدرجة إنهم مش عايزين ياكلوا غير سندويتشات باباهم ..راحه برضوا...وكباية الشاي الأخضر أبو نعناع تجنن من إيدين أبو البنين ...ربنا يخلي البنين وأبو البنين ...
وحقيقي عرفت قيمة دعوة أمي ..ربنا يسترك يا بنتي ويوقف لك ولاد الحلال.
تحديث:
علشان الدنيا فعلاً مش كلها بمبي على رأي مجداويه ومش نافع الأمور تكون في الغربه جميله وزي الفل كده على طول ..وبصراحه ولا حتى في بلدنا ..وبعد الحب إللي شفته في المستشفى طلع على عيني أجوازاً وأفرادا لما روحت البيت..طبعاً مقولتش لحد إني هعمل عمليه لأني مش بحب أشيل حد همي ..وعلشان في مواقف كتير لقيت إن محدش هنا بيعبر حد فآثرت السلامه ..ومحدش عرف غير جاره مصريه ..لاني تركت رامز عندها وده لأن إبنها من سنه وهو بيلعب معاه باستمرار..والجاره تطوعت وأخبرت الجيران إني عملت عمليه ..ولكن موقفهم كان غريب جداً ..إتلككوا إني ما قلتش ليه إني هعمل عمليه ..وكأني كان مطلوب مني إني ألف على سكان العماره نفر نفر وأقول في إذاعة ال C.N.N إني عهمل عمليه ..ده غير شوية تلاكيك تانيه على الماشي....المهم إن محدش سأل...واضح كده إن دعوة أمي إن ربنا يوقفلي ولاد الحلال مشملتش العماره..
الغريب في الموضوع إنهم ما كانش ليهم سيره في لقاءاتهم غير وقفتي جنبهم ..مع إللي بتولد.. ومع إللي عيانه ..ومع إللي بتعزل ..حتى لما حماتي كانت عندي حاكولها عن مواقفي معاهم ...مش بقول ده والله من باب الرياء ..ربنا يبعدنا عنه ..لكن بوضح تعاملاتي معاهم.
في الحقيقه أنا مش مستغربه ده لأني متوقعاه ..فأنا من ساعة ما جيت الغربه وأنا بتعرض لمواقف من دي كتير ..ويمكن المواقف دي علمتني أتعامل مع الناس إزاي ..ولكن إللي فيه طبع مش بيتغير... بيكون عندي أمل إن الناس تطلع كويسه ويخيبوا ظني ...والمشكله إني مش بعرف أعامل الناس بنفس معاملتهم معايا ...لأني بشوف إن الإنسان كده هينسى هويته وهيتحول لمجموعه من التصرفات المبنيه على تصرفات الآخرين معاه ..يعني هيكون مش نفسه ..
على العموم ربنا يسامحنا كلنا ويهدينا.
ويستجيب دعوات أمي وحماتي وكل الناس الجميله إللي سألوا عني في المدونه وده هو إللي باقي ..الحب في الله ..اللهم أدم نعمته علينا.

17 من أمدوا قلمي مداده:

موناليزا يقول...

ربنا يتمم شفاكى على خير والف حمدالله على سلامتك
والحمدلله انك مكنتيش لوحدك
وربنا يباركلك فى زوجك وابنائك

حنين الجنة يقول...

السلام عليكم أختي فى الله
اثرت فيا كلماتك لدرجة انى مش شايفة اكتب من دموعى
فكرتينى بغربنى وولادتى فى حنين وحازم
هو صحيح يا عسولة انا جوزى مش دكتور بس زى ماقلتي القلوب الطيبة موجودة ودعوة الام بالستر ملا حقانى الحمد لله
الظروف بتحكم دايما انى اولد هنا بس سبحان الله
حنان منان كريم عظيم
والسحر الموجود بين حرفين الكاف والنون
تقبلى مرورى حبيبتي والف سلامة عليكى

mohra يقول...

الف سلامه عليكى

عاشقه الفردوس يقول...

ايه ده
كده ماتقوليش
طيب والله زعلت

انا بحبك اوي وكنت متضايقه وانا بقرا البوست ع الاقل كنت خدت رقمك واتطمنت عليكي

عموما حمدالله علي سلامتك وربنا يقومك بالسلامه يارب


ويارب يارب يخليلك ابو البينين وولادك يارب
شربتات ماشاء الله

سبهللة يقول...

ألأف سلامة عليكى وربنا يتم شفاكى على خير
وربنا يخليلك زوجك واولادك
بصى انا كنت عشت فترة فى السعودية
واللى بتحكى عليه دة حصل معايا ويمكن أكتر ملا زوجى عمل عمليه هناك
حسيت ان كل الناس أهلى مصريين وغير مصريين
ولما كنا فى المستشفى عجبونى اوى الممرضات الفلبينيات هايلين فى شغلهم
بس اوعدك لما الممرضات المصريات اللى بيشتغلوا فى مصر ياخدوا نفس راتب الفلبينية فى السعودية والمميزات التانية اللى انتى اكيد عارفاه
أكيد هايهتموا ويبتسموا للمريض وهايشيلوه على كفوف الراحة

ahmed_k يقول...

الف الف سلامه عليكي
والله مكنت أعرف
محدش قاللي
بس الحمد لله انك كويسه دلوقتي
ربنا يخليلك أبو البنين والبنين ويباركلك فيهم
ويجازي خير كل الأطباء والممرضات اللي ذكرتيهم

وترجعي لبلدك وأهلك وانتي بألف خير

والسلام عليكم ورحمة الله

الحافـــــــي يقول...

اللي انا مستغرب له فعلا و ما كنتش متصوره التفاعل الغريب ده مع ناس ما تعرفيهاش فعلا الارتياح بالروح مش بالجسد
شفاكي الله و عافاكي يا زوجتي الحبيبة و أكثر الله من زملائك الأفاضل اصحاب البلوجات و عقبالي يا رب لما يبقي لي مريدين بيحبوني زيك كده

زوجك الحافي

حرة المداد يقول...

سلام الله عليك أختي وشفاك وعافاك من كل سوء..قلقت عليك جدا لأني لم أستطع الدخول على مدونتك طيلة الأيام الماضية ولا أدري أين كان العطل!
جزاك الله كل خير على عزائك الرقيق..تمنياتي لك بموفور الصحة والسعادة مع البنين وأبو البنين.جميل أن تذكري هذه الجوانب المضيئة عن المصريين بالخارج ودائما الامة مازالت بخير ودمت أنت بخير.

و القادم....أجمل يقول...

أولا ربنا يحفظك إنتي و أسرتك كلها
و يديم عليكم نعمة الصحة و السعادة
الغربة صعبة جدا
بس لما الواحد بيكون معاه ناس من بلده
بيهون الوضع
حمدلله على سلامتك
:)

إيما ( أم البنين) يقول...

موناليزا
ربنا يكرمك يارب وشكرا على الزياره



حنين الجنه
دموعك دي غاليه عندي جدا ..ومبسوطه قوي بمعرفتك ..فمن خلال مدونتك وصلني إحساس إنك زوجه ومسلمه ملتزمه ...ربنا يكرمك



Mohra
شكرا يا جميله ..زيارتك أسعدتني



عاشقة الفردوس
ربنا يكرمك على مشاعرك الطيبه دي ..وكأنك سألتي علي ..وربنا يديم المحبه في الله



سبهلله
إزيك يا قمر ..لقءكم الحريمي كان زي العسل
وبالنسبه للممرضات المصريات ..في منهم ناس غلابه وكويسين ..لكن صدقيني حتى لو بيقبضوا كويس زي ما بتقولي برضوا مش هيتغيروا ..أنا جدي الله يرحمه في أيامه الأخيره عمل عمليه لإست
ئصال سرطان
من ال
معده ..وطبعا عملها في مستشفى خاص كبيره في الدقي ..و
طبعا الممرضات فيها بيقبضوا كويس..مش هقولك عل الصفاقه إللي الممرضه كانت بتتعامل بيها مع راجل عنده 80 سنه ومريض بمرض زي ده ..لدرجة إنها قالت أمامه إنه خلاص هيموت .زهنوجع دماغها ليه علشان بابا طلب منها تديله مسكن..شفت الحنيه..ومش دي بس حاجات كتير كنت بشفها منهم بحكم عملي ..ربنا يهدي



Ahmed_k
ربنا يكرمك على زيارتك ..وعلى مشاعرك الطيبه



الحــافي رفيق النضال
ده نظام أررررر ولا إيه؟
ربنا يكرمك على وقفتك معايا ..ولو إنك قلبت الأولاد عليه .زخلاص مش عايزين يكلوا غير سندويتشات الهمبرجر بتاعتك
إن شاء الله المدونه بتعتك هتكسر الدنيا بس لما تفضلها شويه ..ربنا يقويك




حرة المداد
أسعدتني زيارتك ..والواحد لازم يقول إللي ليه وإللي عليه ..ولو إن الجوانب كلها مش مضيئه ولازم يكون في حد يعكنن عليك ..ربنا يسامحهم ويهديهم



والقادم أجمل
والله وحشتيني جدا ..حمدا لله على السلامه
أسعدتني زيارتك

الطائر الحزين يقول...

شفاك الله و عفاك
طهور اان شاء الله

شــــمـس الديـن يقول...

السلام عليكم و رحمة الله و بركاتة

اولا الف حمد لله علي السلامة

كفارة :)

ثانيا .,... ان الله في عون العبد مادام العبد في عون اخيه

الحمد لله ربنا فعلا مش بينسي حد , و شوفي انت مثلا بتعملي جمايل في الناس و لكن بتبغي بيها وجه ربنا فربنا قعده ليكي و خلي كل المستشفي جنة و وقفوا معاكي يمكن اكتر من الاهل

لا تعتبي علي الناس قليلة الاصل اللي بتتحجج باي حجة دول و عامليهم كأنهم هواء غير موجودين او وسيلة لكسب الثواب
لكن فعلا مش تنتظري اي شئ من اي حد ايا كان و هتلاقي جوائز السماء زي ما عبد الوهاب مطاوع رحمة الله عليه كان يقول



بجد عودا احمدا و ربنا يخليليك ابو البنين يا رب و يديم عليكي نعمة وجودة جنبك دنيا و اخرة :)

حنين الجنة يقول...

السلام عليكم اختى الفاضلة
ده مش تعليق انا بس كنت بطمن على صحة حضرتك النهاردة ياربي دايما بخير
اطمنت شوية لما شفت رد حضرتك عند الاخت فاتيما
أتم الله شفاكى
ومتعك بالصعة

دانتيلا يقول...

حبيبتى ام البنين
الف سلامة عليكى. وربنا يديم عليكى الصحة والعافية يارب.
واتمنى ان نكون كمصريين قلب واحد سواء فى الوطن او الغربة

دانتيلا يقول...

على فكرة. مدونتى فى جيران رابطها هو:
http://dodo555555.jeeran.com/

لورنس العرب يقول...

الحمد لله على سلامتك
اجراء العمليات في الخارج بيكون شيء صعب شويه
خاصة وان الواحد بيكون بعيد عن اهله
أما بالنسبة لموضوع التمريض- فأقول تعليقا على -سبهلله- الممرضات في المستشفيات الكبرى داخل مصر مثل الفلبينيات في السعوديه
نظام والتزام وتعامل محترم
لأنهم لو اظهروا شيئا آخر للمرضى سيكون مصيرهم معروف
ألف سلامه عليكي

احمد ابوالعلا يقول...

الف حمد لله على سلامتك
دعواتى لك بدوام الصحة والنجاح