الأحد، 10 أغسطس، 2008

صديقتي ...والنت


قرأت تدونه جميله أعجبتني للأستاذ أحمد كمال صاحب مدونة رحايا العمر بعنوان رأي الناس ..وكان بيقول فيها إن الناس بتاخد الأمور بمظاهرها....وتزامن مع قراءتي لها حدوث موقف يدل على الكلام ده فعلاً ..هحكي الموقف أولاً وبعد كده هقول رأي ...مجرد رأي ...لكل زوجه ولكل زوج ..
في أخت إتعرفت عليها هنا في السعوديه..وقت ما إتعرفت عليها كانت لسه عروسه جديده..يعني جديده على الحياة الزوجيه ..وإللي تعرف عنها حاجات بسيطه جداً ..مش عارفه العيب في مين بالضبط لكن هو ده حالها ..والفتره إللي فاتت ..طبعاً هي دلوقت معاها طفلين صغيرين ..كانت كلها شكوى من زوجها وتصرفاته معاها ..وإنه مش رومانسي ..وإنه عصبي وخاصة لما بيكون عنده مشكله في شغله ..طيب ما إنت عارفه السبب أهو ..إستحملي يا ست شويه وعديها ..لكن لأ ..تعدي ليه ..وكمان مش بيقولها كلام حلو لما بيرجع من شغله ..وغلبت أقنعها إن أي راجل لما بيرجع من شغله بيبقى عايز يحط همه في أي حد وإن الأحسن إن هي إللي تقول كلام حلو ومتستناش أبداً ..أبداً المعامله بالمثل في الوقت ده.... وهو لما يروق هيقولها كل إللي نفسها في ..لكن تقول لمين ..راسها وألف سيف إنه هو إللي لازم يتغير ...عبيطه دي ولا إيه ..بصراحه قلتلها كده ..علشان ده عشم إبليس في الجنه ..المهم إني حاولت كتير معاها أوضح لها إن كل شكواها من زوجها فيها حاجات أساسيه تقريباً في رجاله كتير ..وإن حظها مش وحش ولا حاجه وإن كل الموضوع إنها محتاجه وقت وهو كمان محتاج وقت علشان يفهموا طباع بعض ..وخاصة إنهم إتجوزوا جواز صالونات وجت معاه السعوديه بسرعه من غير فترة خطوبه ..وحتى فترة وجودها في السعوديه معاه بسيطه لأنها كل شويه تنزل مصر بحجة إنها تعبانه من الحمل ..يعني ما فيش وقت كافي علشان يفهموا بعض ..كل ده كان حواري معاها ..وشويه شويه بدأت تحس إنها فعلاً مش عارفه حاجات كتير ..
لكن المشكله إنها كانت مش بتصدقني لما بقولها إن مشاكل كتير من إللي بتقولها بتحصل مع كل المتزوجين ..ومفيش حياة من غير مشاكل ..مستحيله ..بس شطارتنا إحنا بقى في حلها ..وفي الطريقه إللي بنستعملها ..وإني أنا شخصياً وأبو البنين بتحصل بنا حاجات كتير من مشاكلها ..لكني فوجئت بيها متصوره عكس ده تماما ..وقالتلي أنا شايفه إنكم متفاهمين ..وسعداء ..طبعا فهمتها إن التفاهم والسعادة لا تتنافى أبدا مع وجود بعض الإختلافات إللي بتعمل مشاكل ..لحد هنا والموضوع كان ماشي كويس والمناقشات بيني وبينها عال العال ..لكنها قالت حاجه تموت من الضحك ..قالت لي ..فاكره رمضان إللي فات لما خرجنا مع بعض كنتم مبسوطين إزاي ومتفاهمين ..إحنا ليه مش كده ..طبعا أنا سمعت الكلام ده كنت هقع من كتر الضحك ...لأن في اليوم ده بالذات كنا دابين خناقه بدأت أحداثها من قبل الفطار وإحنا في الطريق ..وإستمرت لحد السحور ..وطبعا ما حدش أخد باله من الكبسه إللي أنا كنت فيها لأني تغاضيت عن المناقشه إللي ضايقتني ..وكمان أبو البنين محبش يكملها نكد وإتكلمنا كويس وهزرنا كمان ..لكن بعد الفطار الجميل معاهم ..وفي الطريق إكتشفت إن أبو البنين مصمم على إللي في دماغه ..إحتمال يكون من باب أنا الراجل وأعمل إللي أنا عايزه ..وطبعا كبرت في دماغي أنا كمان وهاتك يا مناقشات ..بس كانت حاميه شويه ..قصدي شويتين ...ومع إن الشياطين بتكون متسلسله في رمضان ..إلا إنها في اليوم ده كانت فكه القيود على الآخر ..المهم إنها إنتهت نهايه كويسه..والموضوع موصلش للمأذون ولا حاجه ..والحمد لله.
وطبعا الصديقه العزيزه ما كنتش مصدقاني ..لأنها أخدت الأمور بظواهرها ..
إلا إن من يومين زادت الخلافات بينها وبين زوجها وطلبت مني ومن أبو البنين التدخل ..وجلسنا معهم لنصلح ذات البين ...زي ما بيقولوا...وفوجئت إن زوجها هو كمان واخد الأمور بظواهرها وبيبص لصحبه الفلاني إللي مراته مهنياه ..ولصحبه العلاني إللي بيتكلم مع زوجته بالساعات على النت وهي في مصر ...وووووووأمثله كتير لحاجات هي مش بتعملها ..يعني عايزها تعمل إللي عشر ستات بيعملوه ..متجوز كوكتيل حضرته ..مقولناش حاجه ..أي نعم المفروض الست تبقى متجدده دايما وتعمل كل حاجه حلوه ترضي الزوج ..لكن مش يبقى مجرد تقليد لكل واحده من إللي ساعته بيشوفهم ...دي تبقى عيشة إيه دي ..وطول القعده سيادته يكرر إنه مش قادر بيحس بصداقه معاها ..مش قادره أفهمها الحكايه دي لحد دلوقت ..طيب وإتجوزها ليه ..كل ده علشان مش بتكلمه بالساعات ع النت من مصر ...لا حول ولا قوة إلا بالله ..بصراحه لولا إني متربيه وبنت ناس كنت مسكت في زمارة رقبته ..من غيظي .. وطبعا أبو البنين هو كمان إتكلم معاه ..علشان يعقله ..وضرب أمثله للمشاكل إللي ممكن تحصل بينا ..وذكر منها إللي حصل في رمضان ..وساعتها صدقت الصديقه العزيزه كلامي ..وعرفت إني مش بقولها كده علشان أهديها ..
المهم إن الأمن مستتب بينهم دلوقت ..وربنا يستر ..
عايزه أقول من الحكايه دي إن الناس ممكن تهدم حياتها لأنها بتشوف إللي حواليها من الظاهر فقط ..وبيبدؤوا يبنوا حياتهم على رؤيتهم الغلط دي ..
يعني الزوجه شايفه كل الرجاله حلوين إلا زوجها ..وهو كمان شايف كل الستات حلوين وزي الفل مع أزواجهم إلا زوجته ..ومفيش حد فيهم حاول يشوف الحلو في الإنسان إللي معاه ..
ياريت كلنا ما ناخدش الأمور بظواهرها...وربنا يهدينا كلنا...