الأحد، 20 يوليو 2008

خـلـيـك كــووووووووووووول

إيما جالسة تقرأ القرآن في أمان الله ..وإذا بزياد يدخل مسرعاً ..
ماما ..عايز مقص .
ليه يا حبيبي ..هتقص إيه ..
هقص البنطلون الجديد إللي جبتيهولي إمبارح.
ياريتني ما جيبته..يعني إيه تقصه ..هو أنا جايباه بنطلون علشان تعمله شورت ما كنا جبنا شورت من الأول وريحنا دماغنا .
لأ ياماما فهمتيني غلط ..
معلش أصلي الأيام دي مخي تخين حبتين ...هبقى أعمله ريجيم .
أنا قصدي هعمل فيه فتحات عند الركبه ..
وعايز تبين ركبتك ليه يا حبيبي ..مش كفايه البنات وإللي عملينه في نفسهم إنت كمان عايز تبين ركبتك ..
علشان أبقى كووووووول..
كوووووول ..وإيه الكوووووول ده بقى ..
دي الموضه يا ماما ..إنت مش عارفه الموضه ولا إيه ..
لا في الحقيقه معرفش ..ومش عايزه أعرف الموضه إللي بيقطعوا فيها الهدوم دي ..يعني أبهاتكم يطلع عنيهم شغل ..وتعب علشان يجيبولكم حاجه عليها القيمه تلبسوها.. وإنتوا تقلوا قيمتكم بنفسكم وتلبسوا لبس مقطع .
ما هي دي الموضه ..يا أمي وهو دا الشباب الروش طحن..إللي بيلبسوا البنطلونات القصيره ..إسمهم كلاش ..وإللي بيلبسوا بنطلونات مقطعه من عند الركبه إسمهم الكووووووول ..والكوووووووول أحسن من الكلاش..
يا سلام هو دا بقى تقييم الناس عندكم..الكلاش والكووووووول..والله عشنا وشفنا الناس بتتقيم ببنطلوناتها القصيره والمقطعه...
على أيامنا كنا بنشوف الواحد والواحده فينا بتقرا لمين ..أو بتطلع الكام على المدرسه..
وإيه المانع إني أكون شاطر في المدرسه ..وألبس زي الكووووووول...مافيهاش حاجه ياعني .
لأ يا حبيبي ما فيهاش حاجه بس تلبس زي الناس المحترمين إللي أنا وبابا نفسنا نشوفك منهم.
بس هي دي الموضه ياماما..غير الموضه بتاعتكم زمان أيام التمانيات والتسعينات..إحنا في 2008
تسرح إيما بعيدا ...يااااااااااااااه إحنا بقينا من زمان قوي كده ...
ماما ..ماما ..رحت فين..؟
أيوه يا حبيبي معاك ..يعني الموضه لو كانت البنات يلبسوا فوق الركبه وبديهات ضيقه ترضى إن بنات خالتك أو بنات عماتك يلبسوا كده ؟
لأ طبعاً ..بس هما غلط يلبسوا كده لأنهم هيبينوا عورتهم إللي ربنا أمرهم يستروها ..لكن أنا مش هبين عورتي ..البنطلون طويل ..وحتى بنطلوناتي القصيره تحت الركبه ..
وهنا يتدخل أبو البنين ..إللي ساكت من بدري وبيراقب الموقف..أصله هو كده يسكت يسكت ويطلع بالكلام إللي هو ..
سأل أبو البنين : وإنت عايز تعمل البنطلون كده ليه ..
زياد: علشان أجرب ..
أبو البنين : وليه مبتجربش تسوق عربيتي متجرب..
سكوت من زياد ...
أبو البنين :ليه مش بتجرب ترمي نفسك من فوق السطوح علشان تطير ..إنت مش نفسك تطير ..
ولا شيء من زياد غير السكوت...!!!!!
في اليوم التالي..تجلس إيما مع زياد وعاصم في جلسة مباحثات ثلاثيه ..وتفتح معهم الموضوع مرة أخرى ..
ويعلق زياد : ياماما هو أنا لما ألبس على الموضه بكون بعمل حاجه حرام ؟
يا زياد يا حبيبي إنت لما تعمل حاجات تتشبه فيها بناس كفره يبقى إنت كده بتعمل حاجه حرام..إلبس يا حبيبي روشنه زي ما إنت عايز لكن في حدود المعقول ومتقلدش حد ..لازم يكون لك اللبس الروش بتاعك إنت ..على ذوقك إنت مش علشان حد لابس كده يبقى لازم نلبس زيه ..خلي ليك شخصيتك المستقله ..
وهنا تألقت عيني زياد بزهو شديد وأعجبته الفكره أن يكون لبسه معبراً عن شخصيته المستقله ..فهو يحب موضوع الإستقلال ده جداً ..طالع ثورجي من صغره ..وقد يكون بدأ في الإقتناع ..
لكن مما لا شك فيه أنهم يحتاجون مجهودا لإقناعهم بأي شيء..
تحدث إيما نفسها ..التي أتعبتها ..
شفت بقى يا ست إيما ..لو كنت مشغوله عن الولاد دلوقت مين إللي كان هيقنع زياد بإنه ميقصش بنطلونه علشان يكون على الموضه ..
طيب يافالحه قومي وشيلي المقصات ليتجنن ويعملها من وراك..
تقوم إيما مسرعة وتخبيء كل مقصات البيت في مكان أمين..
تحديث
عايزه أقول إني في مدونتي مش بعترض على عمل المرأه ..لأنه أصبح ضروره من ضروريات الحياة لأسر كثيره..ولكني بناقش قضية إهتمام المرأه ببيتها وزوجها وأولاها..لأنها عندما وافقت أن تصبح زوجه وافقت ضمنيا على أن تصبح أمأ.
وقدتكون المرأه لا تعمل ولكنها لا تهتم بأولادها ولا بزوجها بالدرجه الكافيه ..وقد تكون إمرأه عامله ولكن مع ذلك أولادها وزوجها هم كل حياتها..الموضوع محتاج موازنه...قد تقدر عليها إمرأه ولا تستطيعها الأخرى ..وهنا يجب التفضيل..
لا أقصد بكلامي أن أسبب حزن لأي إمرأه ..فهي في النهاية أم وتحب أولادها..وأنا هنا أسرد مواقف شخصية ومشاهدات يومية في الحياة من حولي ..وصراعات بيني وبين إيما التى تريد أن تكون دكتوره أد الدنيا.
إدعولي

24 من أمدوا قلمي مداده:

فاتيما يقول...

الله ينور يا ام البنين
أهو كدا
على فكرة إنتى بتدى دلوقتى دروس مجانية فى فن التحدث مع الأبناء
أصل الولاد عموماً دماغهم ناشفة و عندهم نزعة زعامة و ميل للتفرد
بس والدهم ما شاء الله عليه قال كلام حلو الواحد برضو يستفيد منه لما يوسف يزنقونى فى يوم ما و يقوله ...
شيل المقصات دا إحتياط ذكى منك
لأنك عارفة إنهم مهما إقتنعوا
برضو ممكن تطلع منهم حركة معيلة
ربنا يخليهمولك يا رب
و تشوفيهم احسن الناس
تحياتى يا حبيبتى

وجهة نظري يقول...

بقت مصيبه تربية رجاله الأيام دي، الله يكون في عونك.

عموما إتخذت الرأي والقول الصواب معاهم في وسيلة الإقناع، كل راجل لازم يكون ليه شخصيته المتميزه وميجريش ورا الكل ويقلدهم. رائعه طريقة إقناعك.

تحياتي ليكي.

سميرة يقول...

هاي ايما "يا أم البنين" العوافي عليكي انا سميرة انا اسفة اني اتأخرت في الرد على تعليقك الرقيق على مدونتي المتواضعة، بصراحة كدا ومن غير زعل اجيال اليومين دول هايجننوني اصل انا بشوف عينات من دي كتير بحكم شغلي كمدرسة. بس برجع واقول الشباب لازم يكون جامح ولازم يجرب ويغلط بس المهم نلحقه وربنا يهدي الجميع.

mohra يقول...

انا ماكنتش اعرف موضوع كوول و كلاش ده
من زياد نستفيد

Mahmoud البطراوى يقول...

معالجتك للموضوع فوق الرائعه بس انا لو من زياد اعقد مباحاثات تانى

ahmed_k يقول...

...يااااااااااااااه إحنا بقينا من زمان قوي كده ...

الجمله دي ياما قلتها لنفسي لما بشوف اللي بيجري من عمايل الطلبه الأيام دي

فعلا درس في كيفية التعامل مع الأبناء
وكيفية تهذيب فكرهم ومعتقداتهم عن العصريه

ربنا يسعدك بيهم ويبارك فيهم

خالص تحياتي لكي ولأبو البنين والبنين

دمتي بكل خير

Mony يقول...

ربنا يعيننا في تربية ابنائنا

و يقر اعيننا بيهم

و يجعلهم من الصالحين


استعيني بالله علي تربيتهم و هتلاقي الفرق

Zianour يقول...

ايما
انا مقصرة معاكي زاسفة انا ماعرفش انك عملتي عملية
يا ريت تسامحيني وتقبلي اسفي
اما بقى بالنسبة للاستاذ زياد فربنا يبارك فيه ويهدينا جميعا لما فيه الصالح
بس يا ايما بلاش تحبكيها معاه طبعا انا مش موافقه على موضوع القص ده بتاتا بس سيبي برضه مساحة ضغيرة لان لكل سن رونقه لو ممكن نتروشن ف حدود معقولة فماشي وفي كل العصور كان دايما الشباب له روشنته
بس الحوار مع الاولاد جميل وراقي وده المفروض يكون الاساس
ربنا يبارك لكي فيهم ويخليكي ويمتعك بالصحة لتواصلي الكفاح معهم
واعتقد المدونة الجديدة هتكون منفس جيد لموضوع الاستقلال واثبات الذات
تحياتي

غير معرف يقول...

انا سبهللة
بالنسبة للبوست انا استفدت منه جدا جدا جدا
لان اياد ابنى حاليا عنده ست سنين ولا يمكن حد غيره يفتح الدولاب ويطلع له اللى يلبسه سواء اذا كان خارج او حتى هدوم البيت
وبصراحة انا سايباه يعمل كدة لان كل اللبس انا اللى شارياه صح من الاول
وبالتالى مش هايفرق معايا اذا كان يلبس التى شيرت الاحمر او الازرق كلهم حلوين
بس مش عارفة لما يكبر شوية هاعمل فيه ايه.. لكن ان شاء الله ربنا يهدينا لما فيه الصواب
========
بالنسبة للإفطار الرمضانى والديش بارتى انا طبعا موافقة بالثلث وهابعت لك ميلى وتليفونى فى تعليق منفصل واوعى تنشريه خدى بالك

blue-wave يقول...

الله ينور عليكم
عرفتوا تقنعوة فعلا
تمام كدا:))

GiGi world يقول...

احلى حاجه عرفتها انى عرفت الفرق بين الشباب الكلاش والشباب الكووووووووووول كان هيبقى منظري ايه دلوقتى فى وسط صحابي
بجد الناس اتهبلت فى البنطلونات المقطعه والديرتي والقرف ده
مدونه رائعه بجد
ربنا يباركلك فى اولادك وزوجك يارب

عاشــــــ النقاب ـقــــة"نونو" يقول...

السلام عليكم
ربنا يبارك لك فيهم
احنا لسة هنشوف
ربك يسترها
تحياتي

مجرد خواطر يقول...

السلام عليكم
ياااااااااه يا ايما جملة واحدة احزنتنى طب تخيلى ابنى محمد بأة هيعمل ايه وانا اصلا ما قعدتش معاه خالص ربنا يستر

حبارير يقول...

يااااااااااااه احنا بقينا من زمان كدة ثم الشرود في الأيام الخالية!!
جملة شعرت بعدها بالخوف والأسى
نبهتني إلى عمري
رغم أن جو التدوينة رشيق وظريف
بارك الله في كل أسرة مسلمة
دكتورة إيما :من ترك شيئا لله عوضه الله خيرا منه
دمتم موفقين
حبارير.

حبارير يقول...

بارك الله فيك يا دكتورة
تدوينة ظريفة رشيقة
اقبلوني ضيفا

غير معرف يقول...

تدوينة ظريفة
بارك الله فيك يا دكتورة
والحوار رشيق
حبارير

همس الاحباب يقول...

اختى العزيزة / ام البنين
بارك الله فيكى
ومتعك بالصحة والسعادة
وربنا يكرمك ويفرحك بالزعريير الصغيريين
بس بجد عجبنى دماغ زياد قوى
فطسنى من الضحك اصلنا بقينا دقة قديمة هههههههههههه
ربنا يحفظه من كل سوء ويحفظ شباب وبنات الامة من كل سوء وتقليد اعمى
تحياتى وتقديرى وتقبلى مرورى

اهو ده عيبه يقول...

ازيك يا ايما
يمكن دى اول مرة اعلق هنا لكن مش اول مرة اقرا موضوع ليكى
بجد التربية بقت حاجه صعبه دلوقتى خصوصا لو عايزة تطلعى رجاله بجد يعتمد عليها
مشاشباه رجال من اللى بنشوفهم كل يوم
ربنا يكون فى عونك وتعلميهم كل شئ جميل ومفيد
وتحياتى لكى

و القادم....أجمل يقول...

جميل يا إيما
ربنا يوفقك في تربيتهم
التربية الصحيحة
إن شاء الله

تقديري و حبي
:)

يا مراكبي يقول...

إيه ده كله

أولا ألف سلامة وحمد الله بالسلامة على نجاح العملية

وثانيا ألف مبروك على إنشاء مدونة الزعارير التلاتة .. حاجة حلوة خالص بجد

ثالثا .. هو أنا كنت في غيبوبة جامده قوي كده علشان يفوتني ده كله؟

كوول بالإنجليزي يعني روش بالعربي الحديث جدا .. وروش دي كلمة بتعبر عن الظرف والحداثة والتجديد والتميز بلغة أبناء العصر الحالي اللي ما يعلم بيه إلا ربنا

وأعتقد والله أعلم إن البنطلون الكول اللي من غير ركبة ده بيتباع متقطع جاهز .. متهيألي كده

أنا مستعد أفتتح مشروع لتقطيع ركب البنطلونات مادام عليه إقبال جامد قوي كده..هههههه

أسوور يقول...

جريدة الأسرة العربية
قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها
وسوف يفتح باب التدريب الصحفى لهواة الصحافة من المدونين
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو بتعليق على هذا البوست نفسه
يترك لينك البوست اللى عايز ينشره الجرنال له
تحت عنوان جريدة الأسرة العربية
الشـــــــــــــــــروط
-مراعاة الصحة اللغوية والنحوي والإملائية قدر الإمكان.
-مراعاة الا يزيد البوست المراد نشره فى الجريدة عن صفحة ايه فور.
- أولوية النشر تكون للبوستات التى فيها موضوعات عامة تهم قراء الصحف.
-اولوية النشر للبوستات التى ترسل على الميل المذكور أعلاه كفايل وورد مرفق.
الجريدة تصدر الإثنين من كل أسبوع

موناليزا يقول...

جميل وجود حوار بين الاباء والابناء والاجمل طولة البال التى يحتاجها الابناء فى التعامل حين تتواجد فى الاباء
ربنا يهديهم ويباركلك فيهم ويعينك على تربيتهم تربية سليمة

د. إيمان مكاوي يقول...

زواري وأحبابي في الله:
إلى كل من علق على التدوينه وإلى كل من قرأها ..أشكركم جميعا على آرائكم التي أفادتني بالتأكيد وأثرت المدونه ..
وأعتذر عن عدم قدرتي على الرد على كل منكم على حدى وذلك لإنشغالي الشديد ..
أسألكم الدعاء ..

Ahmed Kamal يقول...

حلو قوي الموضوع ده ، نفس الحوارات في كل بيت ..