الخميس، 31 يوليو، 2008

أخيرا حلينا الواجب


بالرغم من إني زمــااااااان أيام المدرسة مكنتش بأجل أي واجبات ..إلا إنه وصلني الواجب ده من فترة من المدونه الحبيبه مهره...صاحبة مدونة الحرافيش....

ومن أخي في الله أحمد زكي الدين صاحب مدونة دردشة عربي

وأخيرا ربنا رزقني بشوية وقت لحله أصل الموضوع ده عايز تركيز عالي جدا كون الواحد يتكلم عن نفسه ويذكر السلبيات قبل الإيجابيات ده لو كان فيه إيجابيات..

بالنسبه لقوانين الواجب فالحقيقه مش عارفاها بس ممكن كده بذكائي الفطري إللي مش بيظهر كتير ..إن الصراحه أهم حاجه في عمل الواجب ده ..الصراحه مع النفس قبل الصراحه مع الناس ..

أما الست أشياء التي يمكن ان أذكرها عن نفسي فهي:



  1. كنت زمان متسرعه ..وسريعة الغضب وخاصة في الحاجات الغلط ..على الأقل من وجهة نظري ..لكن دلوقت ..مع السن (متركزوش على كلمة السن دي )وزيادة الخبره في الحياة ..وأهم من ده كله إرتباطي بالدكتور أيمن (أبو البنين) أصبحت أكثر تعقلا في إستقبالي لسخافات البشر .


  2. كنت بزعل بسرعه وآخذ على خاطري ..لكن دلوقت إتعلمت إني أحط نفسي مكان الآخرين وأفكر لو كنت في الموقف ده هتصرف إزاي ..وساعتها بقدر تصرفات ناس كتير أو بوجد أعذار لناس كتير وبالتالي زعلي بقى بعيد شويه ..بس لسه بزعل من إللي مشاعرهم متجمده ..


  3. كنت بتعامل بحب شديد مع كل إللي بعرفهم حتى لو معرفه جديده وبالتالي بزعل من تعاملهم معايا بسطحيه ..لكني إتعلمت من أبو البنين إن الناس حوالينا في دوائر وكل فئه ليها دائره خاصه بيها وكل ما قربت الدائره كل ما إتعالملنا بحب أكتر معاهم ..وإني لازم أعرف الناس أكتر علشان أقرر أحطهم في أي دائره ..بصراحه عمليه صعبه شويه ..وأنا بخلص الموضوع بإحساسي إللي غالبا بيدلني على الصح ..بس يقيت حاطه موضوع الدوائر ده في مخي ..ولو إني بحب الناس كلها في الله ..


  4. كان نفسي أتخصص في أمراض النسا والولاده ..لكن القدر وطريقة حياتي ..وحبي لتواجدي المستمر مع أولادي إللي هما الزعارررررررير..خلاني أختار تخصص تاني ..أسألكم الدعــااااااااء


  5. دي بقى حاجه محدش يعرفها ..كنت ناويه بعد شهر من دخولي كلية الطب ..وبالرغم من إني دخلاها بكامل إرادتي وأنا في كامل قواي العقليه ..إلا إني كنت هحول لكلية الفنون التطبيقيه..لأني بحب الرسم جدا وساعات كده بشخبط شوية شخابيط وكنت عايزه أكمل دراستي في مجال هوايتي لكن حبي للطب ..وإني أكون ست الدكتوره ..غلب ..بس لسه لحد دلوقت نفسي أدرس رسم..


  6. نفسي ربنا يرزق أولادي زوجات صالحات ..تقر بهن أعينهم ....ياااااااااااااارب.

وأخيرا بهدي الواجب ده لكل زوار أم البنين..


7 من أمدوا قلمي مداده:

ahmed_k يقول...

شااااااطره يا إيما
10/10
لأ قصدي 6/6 إجاباتك جميله وعفويه
وممكن اخمن التخصص اللي إخترتيه
أطفال مش كده ولا اييييييييه

بشكل عام ارجو لكي السعاده في حياتك
كما أتمني لكي التوفيق في مناقشتك للماجستير

تحياتي لدكتور أيمن ولفريق الزعارير

في أمان الله وحفظه

فاتيما يقول...

الله ينور يا إيما
أحييكى على صراحتك
و أهم معلومتين طلعت بيهم من البوست دا
إن سيادتك تبقى دكاتورة و دى معلومة مكنتش أعرفها
و ثانياً إنك زوجة محبة جدا ( الله و اكبر فى عينى و عين كل اللى يدخل و يقرى )
و مش هقول ثالثاً إنك ام معطاءة لأن دا واضح جداً من اول المدونة لآخرها و حتى الإسم اللى إخترتيه لنفسك كان بيهم و ليهم
ربنا يسعدك و يخليلك ولادك و زوجك العزيز
يا رب أللهم آمين

عصفور المدينة يقول...

شكرا لك مرتين أن عرفتني بمدونتك وزيارتك لمدونتي وثالثا لقراءتي لهذه المصارحة المختصرة البليغة
تحياتي للدكتور الفاضل أيمن الذي أحسبه رجلا حكيما
بارك الله فيكما

Habib يقول...

الأخت الفاضلة أم البنين
أولا بارك الله لكي في بيتك وزوجك الكريم وابناؤك .. ويارب يقدركم وتربوهم تربية اسلامية ينفعوا دينهم ومجتمعهم ونفسهم

اجاباتك على الاسئلة دي توضح أد ايه ان الانسان كل ما تمر عليه سنة اكتر في الدنيا دي بيزداد خبرة وتعامله مع الحياة بيكون أحسن وأنضج

فعلا انا حسيت ده لما باقارن تفكيري من سنوات وتفكيري الأن بالاحظ فرق كبير

موضوع اننا نقسم معارفنا وعلاقتنا دوائر ده موضوع جميل ومريح لينا .. وما ننتظرش اننا ناخد مقابل اللي بنديه

كمان التخصص ده يوضح أد ايه القدر له الدور الاكبر في حياتنا مهما اخدنا بالاسباب مع اننا مطالبين بالأخذ بالاسباب طبعا

الله يحفظلكم اولادكم ويعينكم على تربيتهم

أخوكم : حبيب

mohra يقول...

انت جميله قوى يا ايما

يا مراكبي يقول...

العلم في الراس مش في الكراس

مش كده؟

أنا بقى هأقولك سر أنقح

أول ما إتخرجت من كلية الهندسة وما كنتش من الأوائل اللي إتعينوا معيدين وعرفت إني هأقدم على الماجستير بعد مرور سنة .. دخلت فعلا كلية التربية الموسيقية اللي في الزمالك

drpharma يقول...

الله ينور يا ايما