الأحد، 10 أغسطس، 2008

صديقتي ...والنت


قرأت تدونه جميله أعجبتني للأستاذ أحمد كمال صاحب مدونة رحايا العمر بعنوان رأي الناس ..وكان بيقول فيها إن الناس بتاخد الأمور بمظاهرها....وتزامن مع قراءتي لها حدوث موقف يدل على الكلام ده فعلاً ..هحكي الموقف أولاً وبعد كده هقول رأي ...مجرد رأي ...لكل زوجه ولكل زوج ..
في أخت إتعرفت عليها هنا في السعوديه..وقت ما إتعرفت عليها كانت لسه عروسه جديده..يعني جديده على الحياة الزوجيه ..وإللي تعرف عنها حاجات بسيطه جداً ..مش عارفه العيب في مين بالضبط لكن هو ده حالها ..والفتره إللي فاتت ..طبعاً هي دلوقت معاها طفلين صغيرين ..كانت كلها شكوى من زوجها وتصرفاته معاها ..وإنه مش رومانسي ..وإنه عصبي وخاصة لما بيكون عنده مشكله في شغله ..طيب ما إنت عارفه السبب أهو ..إستحملي يا ست شويه وعديها ..لكن لأ ..تعدي ليه ..وكمان مش بيقولها كلام حلو لما بيرجع من شغله ..وغلبت أقنعها إن أي راجل لما بيرجع من شغله بيبقى عايز يحط همه في أي حد وإن الأحسن إن هي إللي تقول كلام حلو ومتستناش أبداً ..أبداً المعامله بالمثل في الوقت ده.... وهو لما يروق هيقولها كل إللي نفسها في ..لكن تقول لمين ..راسها وألف سيف إنه هو إللي لازم يتغير ...عبيطه دي ولا إيه ..بصراحه قلتلها كده ..علشان ده عشم إبليس في الجنه ..المهم إني حاولت كتير معاها أوضح لها إن كل شكواها من زوجها فيها حاجات أساسيه تقريباً في رجاله كتير ..وإن حظها مش وحش ولا حاجه وإن كل الموضوع إنها محتاجه وقت وهو كمان محتاج وقت علشان يفهموا طباع بعض ..وخاصة إنهم إتجوزوا جواز صالونات وجت معاه السعوديه بسرعه من غير فترة خطوبه ..وحتى فترة وجودها في السعوديه معاه بسيطه لأنها كل شويه تنزل مصر بحجة إنها تعبانه من الحمل ..يعني ما فيش وقت كافي علشان يفهموا بعض ..كل ده كان حواري معاها ..وشويه شويه بدأت تحس إنها فعلاً مش عارفه حاجات كتير ..
لكن المشكله إنها كانت مش بتصدقني لما بقولها إن مشاكل كتير من إللي بتقولها بتحصل مع كل المتزوجين ..ومفيش حياة من غير مشاكل ..مستحيله ..بس شطارتنا إحنا بقى في حلها ..وفي الطريقه إللي بنستعملها ..وإني أنا شخصياً وأبو البنين بتحصل بنا حاجات كتير من مشاكلها ..لكني فوجئت بيها متصوره عكس ده تماما ..وقالتلي أنا شايفه إنكم متفاهمين ..وسعداء ..طبعا فهمتها إن التفاهم والسعادة لا تتنافى أبدا مع وجود بعض الإختلافات إللي بتعمل مشاكل ..لحد هنا والموضوع كان ماشي كويس والمناقشات بيني وبينها عال العال ..لكنها قالت حاجه تموت من الضحك ..قالت لي ..فاكره رمضان إللي فات لما خرجنا مع بعض كنتم مبسوطين إزاي ومتفاهمين ..إحنا ليه مش كده ..طبعا أنا سمعت الكلام ده كنت هقع من كتر الضحك ...لأن في اليوم ده بالذات كنا دابين خناقه بدأت أحداثها من قبل الفطار وإحنا في الطريق ..وإستمرت لحد السحور ..وطبعا ما حدش أخد باله من الكبسه إللي أنا كنت فيها لأني تغاضيت عن المناقشه إللي ضايقتني ..وكمان أبو البنين محبش يكملها نكد وإتكلمنا كويس وهزرنا كمان ..لكن بعد الفطار الجميل معاهم ..وفي الطريق إكتشفت إن أبو البنين مصمم على إللي في دماغه ..إحتمال يكون من باب أنا الراجل وأعمل إللي أنا عايزه ..وطبعا كبرت في دماغي أنا كمان وهاتك يا مناقشات ..بس كانت حاميه شويه ..قصدي شويتين ...ومع إن الشياطين بتكون متسلسله في رمضان ..إلا إنها في اليوم ده كانت فكه القيود على الآخر ..المهم إنها إنتهت نهايه كويسه..والموضوع موصلش للمأذون ولا حاجه ..والحمد لله.
وطبعا الصديقه العزيزه ما كنتش مصدقاني ..لأنها أخدت الأمور بظواهرها ..
إلا إن من يومين زادت الخلافات بينها وبين زوجها وطلبت مني ومن أبو البنين التدخل ..وجلسنا معهم لنصلح ذات البين ...زي ما بيقولوا...وفوجئت إن زوجها هو كمان واخد الأمور بظواهرها وبيبص لصحبه الفلاني إللي مراته مهنياه ..ولصحبه العلاني إللي بيتكلم مع زوجته بالساعات على النت وهي في مصر ...وووووووأمثله كتير لحاجات هي مش بتعملها ..يعني عايزها تعمل إللي عشر ستات بيعملوه ..متجوز كوكتيل حضرته ..مقولناش حاجه ..أي نعم المفروض الست تبقى متجدده دايما وتعمل كل حاجه حلوه ترضي الزوج ..لكن مش يبقى مجرد تقليد لكل واحده من إللي ساعته بيشوفهم ...دي تبقى عيشة إيه دي ..وطول القعده سيادته يكرر إنه مش قادر بيحس بصداقه معاها ..مش قادره أفهمها الحكايه دي لحد دلوقت ..طيب وإتجوزها ليه ..كل ده علشان مش بتكلمه بالساعات ع النت من مصر ...لا حول ولا قوة إلا بالله ..بصراحه لولا إني متربيه وبنت ناس كنت مسكت في زمارة رقبته ..من غيظي .. وطبعا أبو البنين هو كمان إتكلم معاه ..علشان يعقله ..وضرب أمثله للمشاكل إللي ممكن تحصل بينا ..وذكر منها إللي حصل في رمضان ..وساعتها صدقت الصديقه العزيزه كلامي ..وعرفت إني مش بقولها كده علشان أهديها ..
المهم إن الأمن مستتب بينهم دلوقت ..وربنا يستر ..
عايزه أقول من الحكايه دي إن الناس ممكن تهدم حياتها لأنها بتشوف إللي حواليها من الظاهر فقط ..وبيبدؤوا يبنوا حياتهم على رؤيتهم الغلط دي ..
يعني الزوجه شايفه كل الرجاله حلوين إلا زوجها ..وهو كمان شايف كل الستات حلوين وزي الفل مع أزواجهم إلا زوجته ..ومفيش حد فيهم حاول يشوف الحلو في الإنسان إللي معاه ..
ياريت كلنا ما ناخدش الأمور بظواهرها...وربنا يهدينا كلنا...











20 من أمدوا قلمي مداده:

اربعين سنة ستيوتند يقول...

بجد كلام حضرتك زي الفل
يعني احييكي عليه
الناس الغرب مبقتش مستحملة بعض حنيجي احنا كمان و نعمل كده
استمري في نصائحك الجميلة عل و عسي يتعظن

أحمد كمال يقول...

موضوع جميل و واقعي ، و حقيقي فعلا الشيطان بيصور للأزواج و الزوجات مقارنات كاذبة ، و كم من مشاكل تحدث في كل بيت ، و أهله أدرى به ، و المظاهر تخدع الآخرين .

جزاك الله خيرا على الموضوع ، و على الإشارة إلى موضوع رأي الناس .

مجداوية يقول...

السلام عليكم


ازى الحال أختنا الحبيبة يا رب دايما بخير أنت وأسرتك الكريمة

لو كان كل مبتسم سعيد لكانت الحياة جنة ولو كان كل حزين بائس لكانت الحياة جهنم لأن الدنيا من ده وده والوحش فيها أكتر والجزن فيها أعم لأنها من اسمها نعرفها فصاحبتك لأنها لسه صغيرة وعقلها وقلبها مشفوش لسه النيا على حقيقتها بتاخد بالمظاهر وفى ناس بتفضل طول عمرها صغيرة مش فى السن ولكن فى الادراك لأنها متعاملتش مع أمور الحياة بمعانيها وفضلت تتعامر بالظاهر

والظاهر انى طولت ودخلت فى متاهات لكن أنا عرفة انك فاهمانى لأنك وصاتى لدرجة ادراك وفهم الدنيا ربنا يكملك بعقلك
ويزيد قلبك بصيرة

فانها لا تعمى الأبصار ولكن تعمى القلوب التى فى الصدور,,صدق الله العظيم

appy يقول...

الحمد لله انكم اتصالحتوا كلكم مع بعض وربنا يهدى الجميع اقصد هما الاتنين وانتم موتوا الشيطان
ويا ريت الناس اصلا تبطل تبص لبعضها لان اللى اعلم بالخبايا هو الله سبحانه وتعالى

فاتيما يقول...

إيما يا ام الزعارير
أزيك يا حبيبتى
الحكاية دى يا ستى بقت من أدبيات العصر الحديث و العولمة
محدش بقى راضى عن حاله و كل حد بيبص لغيره عايش إزاى و عاوز يبقى زيه فى المميزات و ملوش دعوة بالعيوب
أنا شخصياً عانيت من النظرة دى فى جوازى و مقدرتش اكمل بسببها
كان إتفاقى مع الضخص اللى إخترته إننا من بيئتين مختلفتين و لأننا بنحب بعض هنتغاضى عن الفوارق و محدش يشد التانى لحياته لكن ممكن نعمل حياة تالتة مختلفة خاصة بينا ( طبعاً كلام اوهام و خيالات بنت عبيطة بتحب ) و اللى قصادها بيستغل الموقف لصالحه لحد ما إتجوزنا و إابتدى الكلام يتغير و نظام مراتى تمشى على عاداتى و اهلى يقولوا إيه و أنا حر و فى الوقت ذاته هوه مبيقمش بأى واجبات مطلوبة منه توازى الحقوق اللى بيطالب بيها
طبعاً فى الأول كنت بستوعب و احاول اصلح و امشى الموضوع
و بعدين فوقت لنفسى و قولت إيه دا
أنا هفضل ادى ادى و كمان اتنازل لحد ماهتوصل للتنازل عن الكرامة ؟؟
و يفضلى إيه بعد ما إنزل فى نظر نفسى ؟
و إبنى دا اللى لسه مولود ؟؟
هرفع راسى إزاى قصاده بعد كدا
و أنا خاضعة كدا
و خدت القرار اللى فتح عليا أبواب جهنم و طلبت الطلاق
صحيح القرار كلفنى تبعات رهيبة منها عدم وجود إبنى فى حضنى و لو مؤقتاً دلوقت
لكن المكاسب اكتر بكتير
لأنى إتولدت من جديديا إيما
و بقى عندى فرصة أخلق لروحى و لأبنى حياة أقرب مما إتمنى
بس الوضع اللى بتقوليه عند صاحبتك دا أخف بكتير من عندى
مادام فيه تكأفوا إجتماعى و عقلى
يبقى بس حكاية التنطيش و تسيير المركب
ربنا يهدى الأحوال للجميع
و دمتى بألف خير يا حبيبتى
إنتى و زوجك العزيز
و اجمل زعارير فى الدنيا

الربان يقول...

تحياتي

اعتقد ان حضرتك في اجازة في مصر الان مع العائلة...اجازة سعيدة ان شاء الله.

اجمل ما في الحياة ان نكون انفسنا...يعني
لا نعيش في جلباب الاخرين....فلا تغرنا مظاهرههم..

الحياة بها الحلو و المر...الخير و الشر
الخطأ و الصواب.....كيف نشعر بطعم السعادة و حياتنا اليومية تمر بوتيرة واحده...

في رأيي ان هذين الزوجين اضاعا أجمل فترة
في حياتهما بمثل هذه الخلافات البسيطة التي لا تستحثق اصلا المناقشة...بل يمكن
التغاضي عنها تماما...


تحياتي و تقديري

mohra يقول...

انا لسه سامعه واحده بنفس الشكل
بصراحه مبقاش فى احترام
مفيش حد شايف ان البيوت اسرار و كل واحد او واحده ماشى يشنع على شريك حياته

ربنا يهدى الجميع

همس الاحباب يقول...

اختى العزيزة
جزاكى الله خيرا
موضوع غاية فى الاهمية واقعى ويحدث كثيرا بين الازواج
والكل ينظر الى غيره وياخذ الامور بظواهرها ولا يهتم ببواطن الامور
وكم من المشاكل التى تحدث وخلافات بسبب تلك النظرة السطحية
والكثير منا لا يحمد الله على نعمته وينظر لغيره
والحمد لله على كل شىء
جزاكى الله خيرا
تحياتى وتقديرى

Zianour يقول...

الحقيقة ان كل واحد فيهم اناني جدا مصر يعيش ف التصورات اللي قبل الزواج غير الواقعية عن العسل والرومانسية الخ الخ وماحدش فيهم عنده استعداد يفتح عينه عشان يشوف ان الزواج واستمراره قائم على بذل الجهد من الاثنين عشان تبقى علاقة صحية وسليمةالامر ليس له علاقة بالشياطين بل بالتربية الخاطئة في بيوتنا العامرة المبنية على التدليل والرحرحة والمبنية على الحصول على ما اريد واغماض العين عما يجب بذله للحصول عليه

وكمان عندهم طفلين؟؟؟؟؟؟؟؟؟؟
بالذمة مش مسخرة؟؟؟؟؟؟؟؟؟

والغربة لم تعلمهم اي درس ؟؟؟؟؟؟؟

اتوقع انهم سيزوركم تاني قريب انتي وابو البنين!!!!!!!!

ربنا يهديهم وينور طريقهم ويفتح عنيهم

تحياتي لقلمك

وجهة نظري يقول...

مفيش حل جاهز لمشاكل الجواز، ومفيش حد ممكن يتدخل بين الراجل ومراته إلا لو راح قعد معاهم 24 ساعه كل يوم. ففكرة إن حد ييجي من بره يحاول يهدي الحكايه مبتنفعش، ممكن أهدي الخناقه دي، بس الخناقات الجايه حيحصل إيه؟؟

لو الراجل ومراته مبيعرفوش يحلوا مشاكلهم بنفسهم يبقي قلته أحسن.

ثانيا مفيش حاجه إسمها أغير مراتي والا أغير جوزي وألا أعود فلان علي عاداتي وألا لازم مراتي تمشي علي هوايا .... مش حيحصل ومش حينفع، ولو حصل النهارده الموقف حينفجر بكره.

الست ممكن تخلي حياة الراجل كارثه وتخليه يطلع من هدومه، سواء عن قصد او غير قصد، وكله بهدوء وفرس علي نار هاديه وقال الله وقال الرسول، وإعترض بقي علي كلام ربنا!! والراجل ممكن يخلي حياة الست ذل وهوان وتتعامل كأسفل السافلين، وبنفس منطق قال الله نفسه!!

بس هي دي الحياه الزوجيه؟ معرفش، ممكن تمشي مع بعض الناس.... بس انا بالنسبالي يمكن عبيط شويه، لو الست مكانتش ند فكري ليا يبقي متنفعش... لو منعرفش نحل مشاكلنا بنفسنا يبقي مالوش لازمه.

الموضوع كبير ومحتاج عقل كبير. أغلب المصريين معندهمش فكره عن معني الجواز.

تحياتي.

ahmed_k يقول...

معقول جدا ما ذكرتيه
فالمظاهر خداعه لبعض الناس
والمشاكل الأسريه التي من هذا النوع رغم تفاهتها لكنها قد تحول الحياه إلى جحيم وقد يهمل علاجها حتى تستفحل وتصل بالزوجين إلى طريق مسدود
فمن المهم جدا الحوار بين الزوجين وإظهار رغبات كل منهما للآخر ومناقشتها بهدوء وجو ودى

بارك الله فيكما لسرحة رأب الصدع بينهما
ونسأل الله لهما الرشد

وتقبلي خالص تحياتي

يا مراكبي يقول...

لن يسنطيع أي شخص أن يحصل على كل شيء في الدنيا .. فالكمال لله وحده .. والإنسان خلق في كبد

وكل منا خصه الله عز وجل بمميزات لا نجدها لدى الأخرين والعكس .. ولكن من منا يعقل ذلك؟ القليل من الناس فقط

طارق الغنام يقول...

ام البنين
ماشاء الله عليكى
دائما بوستاتك تحمل مواضيع هامه
تقبلى تحياتى ودمت بود

قشتمر يقول...

اعتقد ان اللي انت قولتيه مهم جدا انا متجوز بقالي 3 سنين بس طبعا موصلتش لكل الاعراض دي بس حاسس انها بتزحف علي حياتي ويا ريت نفتح نقاش كبير في الموضوع ده ويكون عندنا اراء لتجارب عملية مش كلام نظري علشان نقدر نستفيد منها

أم منة الله يقول...

غاليتى ام البنين
بداية احييك على كلامك الرائع
الحقيقة التوافق و الحب و التفاهم بين الزوجين نعمة من الله قلما يحظى بها الازواج نظرا لسوء الاختيار من البداية
هناك صنف من البشر لم يهيئ اجتماعيا ليكون له شريك عمر يعيشا سويا على الرحمة و التراحم و الاحترام و تحمل المسؤولية و بالتالى تجدينهم ازواج غير سعداء و ايضا اباء فاشلين
الغالبية العظمى لا يعرفون لماذا يتزوجون و بمن يتزوجون و كيف يتعاملون مع ازواجهم او زوجاتهم
و تصبح كارثة لو اقتران الجهل بالغباء و عدم الرضا فتصبح الحياة جحيم و يصبح الزواج سجن ابدى صعب التخلص منه
اتمنى ان لا نضع العربة قبل الحصان و ان نبنى البيت قبل الاساس
الاساس هو الحب و التفاهم و صفات مشتركة فى الزوجين يجب التأكد منها قبل الاقدام على شراكة العمر حتى لا تصبح ورطة العمر
اسأل الله للجميع السعادة و الرضا و التفاهم و سعة الصدر و فوق كل هذا المودة و الرحمة كما وصانا رب العالمين

تحية مرة اخرى لك غاليتى و كل عام و انت بالف خير و سعادة

عبده الرايق يقول...

السلام عليكم
ام البنين
يسعدنا اخبارك ان تدوينه
شبكه الهنا
سيتم نشرها فى مدونه الضاحكون
يوم الاحد القادم بأذن الله
ونرجو تواجدك حتى تقومى بالرد على زوارك
مع خالص تحياتى
عبده الرايق

Habib يقول...

السلام عليكم ورحمة الله وبركاته

بارك الله فيكي أختنا الفاضلة .. وربي يحفظكم ويبارك لكم في اسرتكم ويديم عليكم الهناء

سبحان الله موضوع مهم جدا .. الواحد بقى يحط ايده على قلبه .. لأني لسة في فترة الخطوبة .. وخطبت وسافرت زي شباب كتير علشان لقمة العيش .. لكن إن شاء الله ربي ييسر الأمور وأحسب إن خطيبتي من العقليات الكويسة يعني .. ربنا ييسر الأمور ونرجع بقى لأن الواحد زهق من الغربة

المشكلة الكبيرة إن الزوج راجع من الشغل ومتخيل ان مراته واقفة مستنياه ورا الباب في ايديها وردة فوشيا .. وهي متخيلة انه هايرجع من الشغل يغير ويجي يساعدها في غسيل المواعين

الموضوع مش كده خالص .. بأقول لكل زوجة يانساء العالم .. لما يكون جوزكم لسة راجع من الشغل سيبوه في حاله .. هو الراجل هايستريح خمس دقايق ويقوم زي الفل .. وباقول الرجال برضه : طولوا بالكم على النساء .. لو انت جربت تعمل اللي بتعمله من غسل ومسح وتربية الاطفال هاتحس أد ايه بيتعبوا

ربنا يهدينا ويملأ بيوت المسلمين سعادة

عصفور المدينة يقول...

بارك الله فيك وفي زوجك ونفع بكما
وأقول أن مثل هذه الدروس المستفادة لابد أن يتم تذكرها دائما والتأكيد عليها ومناقشتها بين الزوجين حتى يتحول كل حدث من هذه الأحداث التي تمر بهما وخاصة تلك التي يكونان فيها حكاما عقلاء بين زوجين آخرين أقول يجب أن تتبلور وتضاف إلى مخزون خبرات يشكل ميثاق تفاهم دائم يتم الرجوع إليه والتذكير به عند حدوث أي عوارض

بارك الله فيكما

mony يقول...

بجد كلام صح يا ام البنين


المشاكل لازم تكون بين الزوجين و الا كدا نكون في الجنة مش علي الارض

بس الشاطر اللي يسايس المشاكل ديه

و الشاطر برضه اللي يعرف يتعامل و مش كل شوي اشمعني فلان و اشمعني علام



و علي رأي القول ب(كوني له عائشة يكون لك محمد)


يعني لو كل واحد منهم ابتدي بنفسه التاني اكيد هيتغير علشانه



هنا بتبان الانانية

الفروض نشوف الطرف التاني عايز ايه و بعدين نطالب بطلباطتنا بعين قوية


الله المعين

An Egyptian يقول...

في مثل بيقول
ماتقارنش خارج الناس بالداخل بتاعك