السبت، 7 فبراير، 2009

شبكة الهنا


تحديث :


نزولا على رغبة زواري الكرام ..عملت مدونة يوميات طبيبة شابة على بلوجر

ويمكن زيارتها من هنا


....................................................................................................................................



ساميه وسامي زوجين مكافحين ..جمع الحب بين قلبهم ..أصلهم كانوا جيران ..يعني نظام ساكن قصادي وبحبه ..

بدؤوا حياتهم في شقه صغيره لكنها
كانت جميله ...

إتنازلت ساميه عن شوية حاجات مقابل إنها تعيش مع سامي في عش الزوجيه الصغير..مع الإنسان إللي بتحبه ..

وفي يوم وبعد العشاء المتين ..وكباية الشاي التمام قعدوا
قعدة صفا أمام التلفزيون مع شوية لب وسوداني وكانت قعده عال العال لحد ما طلع المذيع إياه أبو دم خفيف بتاع تسعين دقيقه ..

وقال خبر جميل ..

الخبر بيقول:إن في قرية مصريه من الصعيد قرر أهل الرأي والمشورة فيها إن الشبكه هتتلغي من القرية يعني كل عروسه هتتجوز مش هيجيلها شبكه وده تعاونا من الاهالي مع العرسان الغلابه إللي بيطلع عينهم في عمل شقة وتجهيزها من كله ..

ما البنات دلوقت عايزين يتجوزوا بكل الكماليات..وكمان شبكه.. دي حوسة إيه دي يا ربي...

لحد هنا والقعده كانت جميله...

لكن الست ساميه إتسرعت وإتشكت في لسانها إللي عرفت بعد كده إنه كان عايز قطعه..وقالت ..

والله برافو عليهم ..قرار سليم ..أما ناس عاقلين بصحيح ..يعني هما البنات هيعملوا إيه بالشبكه لما يتجوزوا وبيتهم ناقص غساله ولا تلفزيون..أو ما يتجوزوش من أصله ..

وهنا كانت الكارثه ..إنتهزها سامي فرصه جات له على طبق من فضه ورد زي الصاروخ ..

ولما ده رأيك.. ليه بقى إتشمللت وإشتريتي شبكه ..ما طلعتيش عاقله ليه وقلت نوفر تمنها ونجيب بيه حاجه في البيت ليه ..أهو كنت رحمتيني ..

ردت ساميه وهي مذهوله من رده إللي أسرع من سرعة الضوء..

وهو إنت كمان ما كنتش عايزني أجيب شبكه ..ليه هو أنا كنت طلبت منك حاجه ..ولا أهلي فتحوا بقهم وطلبوا منك شبكه بكذا ألف جنيه زي باقي الأهالي الناصحين ما بيعملوا ..

بس برضوا إشتريتي شبكه ..

يعني إيه كنت عايز تتجوزني ببلاش كده من غير شبكه..

خلاص يبقى ما تقوليش ..والله برافو عليهم ..والبنات هتعمل إيه بالشبكه ..والكلام إياه ده ..بلاش الشعارات دي وحيات أبوك..

طبعا ساميه سمعت سيرة أبوها إتحمقت وقالت:ما لك ومال أبويا دلوقت ..الحق عليه إتساهل معاك كتير ..قال ده شاب لسه متخرج ..وبيبني نفسه بنفسه ..هنكون إحنا والزمن عليه ..ورضي بكل إللي قلته ..

بس برضو جبت شبكه..يعني مقصرتش..

وأنا كمان إخترت شبكه تمنها معقول علشان مكلفكش

وليه ما إخترتيش حاجه أرخص من كده..!!

وهاختار أرخص من كده إيه ما هو إنت طلعت ناصح ومرضتش تنزل معايا ننقي الشبكه ولمحتلي من بعيد بالمبلغ إللي في حدوده أشتري الشبكه ..ونزلت أنا مع عمتي ننقي الشبكه ..وفضلت يا ولداه واخد الصاغه رايحه جايه لحد ما جالي كساح علشان ألاقي شبكه تمنها على قد فلوسك..وعمتي الأروبه تختار حاجات تحفه وأنا أقولها لأ مش عاجباني أصلها بلدي ..وهي طبعا في منتهى الجمال..كل ده ومش عاجبك..كنت أعمل إيه أكثر من كده..!!!

يعني لو كنت قلت لك بلاش شبكه ..كنت ها توافقي ..؟

تستعد ساميه للرد ..

ولكن سامي لا يعطيها الفرصه للرد ..ويقول :لو قلت آه تبقي كدابه ..دا كان شيء لازم حتى لو كنت إنت مش مقتنعه ..ولو إنك أكيد كنت مقتنعه وبالثلث كمان..

تشعر ساميه إنها مش عايزه تقول رأيها ..لأنه تسرع وقال رأيها بالنيابه عنها ..

ولكن تسيبه لأ طبعاً وإلا ما تبقاش ساميه بنت أم ساميه ..

يعني كنت عايز زفه وفرح ومعازيم ..وقاعه قد الدنيا ..ونيجي نفرج الناس على علبة الشبكه تطلع فاضيه وفيها دبلتين وواحده منهم فضه كمان ..دي تبقى كاسفة إيه دي ..

دي كانت طنط كوكي ولا طنط سوسو أكلوا وشي وعملوها فضيحه في العيله لمدة عشر سنين قُدام.

شفت يعني الموضوع موضوع ناس ومظاهر وبس ..يبقى بلاش كلام الشعارات ده ..ملوش لازمه..

أنا مش بقول شعارات..

وبكل خبث..يرد سامي ..خلاص لو كلامك ده مش شعارات بيعي الشبكه إللي مش محتاجاها دي وهاتي بتمنها الغسالة الفل أوتوماتيك إللي عماله تزني عليها كل شويه ..

وبدون أن تشعر ساميه بالخيَه إللي بيرسمها لها سامي ..ترد بكل عزم وتصميم ..وماله ..إنزل إنت إحجز الغساله وأنا ها خد الشبكه أبيعها عند الصايغ إللي في أول الشارع ..

تدخل ساميه غرفة النوم علشان تجيب العلبه أم قفل إللي قفلاها على الشبكه ..ولكنها فجأه تتذكر حاجه مهمه جداً ..راحت عن بالها ..دي باعت الشبكه من سنتين لما حبوا يدخلوا التليفون ومكنش معاهم فلوس وقتها ..يعني مفيش شبكه

تخرج ساميه مندفعة من غرفتها علشان تنتقم من سامي وتثبت له إنها مش بتقول كلام شعارات ..

سامي... سامي ...

مفيش سامي ..

ما كانش موجود في الشقه ..

واضح كده إنه راح يحجز الغساله ..


10 من أمدوا قلمي مداده:

نهر الحب يقول...

نقار زوجى
سببه الاول التسرع وعد الصبر
وعدم فهم الاخر والتماس له العذر سبحان الله
لو كل واحد بيدى بحب مكنيش بقى فى مشكلة ولا انتظار مين جاب اية ولا فين

تحياتى وتقديرى لك

لورنس العرب يقول...

من عادات الناس انهم بيتكلموا في امور ماليها اي لزوم في اوقات غريبه
يعني دول مثلا قاعدين امام التليفزيون وخبر عابر عدى
ايه لازمة الكلام ده من الاساس؟
وبعدين القصه دي بتثبت حاجه
وهي ان الناس كلها بيبقوا مخزنين حاجات جواهم ولكن بينتهزوا الفرصه ويطلعوا كل اللي جواهم
والامور بتيجي على دماغ الكل في الآخر

حاجات غريبه ولله

ahmed_k يقول...

ههههههههه
كان مالوا لو قعدت ساكته
بس تصدقي برضو فكره رائعه
أيه لازمة الشبكه دي
آآآخ لو إتلغت خالص
تبقى فل

mohra يقول...

هههههههههه
تحفه

لجين أبو الدهب يقول...

للاسف مفهوم الشبكة الايام دى بقى مفهوم خاطئ ..
الشبكة عبارة عن هدية بيقدمها العريس للعروسة ..
وفى العادى لما حد يجيب لحد هدية مش بقولها جيبها لى بكذا او شكلها كذا .. دى بتكون هدية .. قدر عليها قدر ما قدرش يخلص .. خاصة ان لو كان عدم المقدرة دى بسبب ان فلوسها هاتتحط فى بيت الزوجية ..
فى ناس بتتمسك بالشبكة تمسك رهيب زى صعيد مصر كده .. والغريب تدخل بيوتهم تلاقيها ناقصة حاجات كتير جدا ضرورية !!

وفى نقطة مهمة برده .. ان لازم الزوج يكون جيبها عن كامل رضى من جواه ..
ويكون عارف وهو رايح للعروسة ان اهلها من الناس اللى بيصمموا على الشبكة ..
علشان ما يحصلش زى ما حصل وكل شوية يقولها جبت شبكة وانا مزنوق وجبت شبكة وانا ظروفى تعبانة ويفضل شايلها فى قلبه ..
لان على ما اد ما هاتكون الواحدة فرحانة بيها على اد اول ما تحس منه انه كان جايبها متضرر هاتضيع فرحتها ..

طرح قيم ..

تحياتى ليكِ ..

son's egypt يقول...

السلام عليكم
التبسط في الاشياء بيكون دايما اجمل شئ في الحيتة بين الزوجين

و القادم....أجمل يقول...

ههههههههه
هي اللي غلطانة بأه
محدش قالها تتسرع في الكلام
:D
بصي انا من رأيئ الاعتدال حلو
يعني لا نلغي الشبكة خالص
و لا نرفع الاسعار للسما

موضوع جمييييييييييل
تسلم الايادي

بالتوفيق دايما
:)

ghorBty يقول...

اسلوب جميل جدا ومشوق

طيب ساميه ديه والله غلابانه اوي

فعلا مكافحه معاه

الحياة مشاركه وكلاهما في مركب واحد يجد علي كل منهم القليل من التضحيه حتي يستقر المركب ويصلا لبر الامان

بوركت استمتعت بالقصه

غربتي

Wise يقول...

سلام عليكم ورحمة الله وبركاته
اسلوب عرضك ماشاء الله يشد جدا
اتمنى لك كل التوفيق
وفعلا الاعتدال حلو فى كل حاجة
وجميل عرضك الفكرة فى اطار قصصى

3borah يقول...

مدونه رائعه ..
تقبلي مروري ..