الاثنين، 26 مايو، 2008

تاج... وكشف حساب.


إستيقظت اليوم على أحاسيس غريبه ومتناقضه فاليوم أنهي عامي الخامس والثلاثين في الحياه ..

توضأت وصليت ودعيت الله أن يعينني لأكمل المشوار..
وكنت قد بيَت النيه على أن أنفرد بنفسي في الصباح لأحاسبها على ما فات وأناقشها في المستقبل ..الذي هو بيد الله –عزَوجلَ- أناقش إيما ..
إنت راضيه عن إللي فات ..؟!! وناويه على إيه بكره..؟!!
نزل أولادي إلى مدرستهم..بعد قبلات وعبارات ..
كل سنه وإنت طيبه ياماما...يا إيما (على فكره زياد أصبح يناديني بهذا الإسم )
وتبعهم زوجي إلى عمله ..بعد دعوه جميله..
كل سنه وإنت بصحه وسعاده ياحبيبتي ..ودايما منوره البيت..
أعددت لنفسي كوب النسكافيه بالقرفه الذي أعشقه في الصباح وجلست في مكاني المفضل على الكرسي الوثير بجانب النافذه حيث أستمتع بأشعة الشمش التي تغمرني ..فتحيلني إلى طائر صغير يرفرف بعيدا في سمائه وكأن السماء كلها أصبحت ملكاً له ...
شعرت بحنين لأن ألقي نظرة على شيء أعطاني طعم آخر للحياه..إتجهت إلى مكان آخر أصبحت أحبه ..إلى حيث يوجد الكمبيوتر...لألقي نظرة على مدوناتي ..وأمر على من أحب من المدونات الأخرى..
وفجأة إنتشرت السعاده في كل مكان..فلقد وجدت مفاجأه غير متوقعه (دلوقت على الأقل )...وجدت تاج أهدي لي من الحبيبه زيانور ..وفي الحقيقه أنا كمان زيها مش عارفه إيه أصل حكاية التاج ده ..لكن من الواضح إنه حاجه مهمه جداً لكل مدون..وبعدها يكون مدون بجد..(يعني هو الأول كان مدون بهزار) ...
الغريب أن الهديه جاءت اليوم...يوم ميلادي..يوم أن قررت أن أحاسب نفسي ..ووجدت أن الأسئله ما هي إلا كشف حساب للنفس عمَا فات ..ونظره إلى ماهو آت..
أولاً..أشكر العزيزه زيانور على هديتها التي جاءت في وقتها.
والأن نبدأ في كشف الحساب..
1.أذكر خمس أحلام على الأقل تخص ماضيك وتحلم فيها بتغير الأشياء ..ماذا ستعدل ..وماذا ستترك ؟
في الحقيقه الأحلام كتيره جدا...
نفسي أختم حفظ القرآن الكريم ..وأحصل على الإجازه وأكون مُحفظه..ولكني إلى الآن أُجاهد في الحفظ...وموضوع الإجازه إتأجل شويه لبعد الماجستير ورجوعنا لمصر..
كان نفسي أول ما أنتهي من الإمتياز والتكليف أبدأ مباشرة في الماجستير لكني أخذت دكتوراه في الأمومه ..ودكتوراه مع مرتبة الشرف كزوجه..والحمد لله..
كان نفسك في إيه تاني يا إيما...إيه ..إيه..؟!!....آه إفتكرت..
كان نفسي أحج أو حتى أعمل عمره...وكان أمل بعيد...لكن مفيش حاجه بعيده على ربنا..طول ما الإنسان عنده ثقه في الله..ورزقني الله العمرة والحج كمان ..أكثر من مره...وهذه أفضل نعم الله عليَ..وأحد محاسن الغربه.
كان نفسي أعيش في بيت في وسط مزرعه ..بتطل على النيل..أشم الهوا مخلوط برائحة الفل ساعة العصاري... وأسمع صوت الكروان ساعة المغربيه..
كان نفسي أشوف المسلمين يد واحده وأنا لسه عايشه ..لكن واضح إنه لسه بدري ...
وكان نفسي لما ربنا يرزقني بأولاد يقولولي حاضر يا ماما على كل حاجه..لكن مفيش نصيب
كده بقوا ست أمنيات ..كفايه عليكم كده.
2.اذكر 5أحلام على الأقل تخص مستقبلك..
ودول كمان كتير جدا ..نحاول نختصرهم..
نفسي أكمل حفظ القرآن وآخذ الإجازه ..وكمان أخلص الماجستير على خير..إدعولي
نفسي أربي أولادي على طاعة الله ..ويكونوا خير دعاة للإسلام..ويحفظوا القرآن في سن صغير ..
نفسي أعمل مركز يهتم بكل شؤون الأسره وهكلمكم عن الحلم ده في بوست منفرد..
نفسي أعمل أي حاجه لأطفال الشوارع ..ونحولهم لناس صالحين ..نفسي نقضي على المشكله من أساسها..
نفسي لما نكبر أنا ورفيق يومياتي يكون عندنا البيت إللي في وسط المزرعه وبيطل على النيل ..ونسمع صوت الكروان مع بعض.
نفسي أعمل مدونه تتكلم عن طرق التقرب إلى الله ..ربنا يسهل وأبدأ فيها قريباً.
3.اذكر شخصين على الأقل متواجدين في حياتك حالياً كنت تود وجودهم قبل الآن بزمن..
زوجي ..كنت أتمنى معرفته حتى قبل أن أولد (معرفش إزاي )
ومدوناتي..لأن حياتي إختلفت معها ..أصبح لها وقع خاص..
4.اذكر شخصين على الأقل غير متواجدين في حياتك حاليا كنت تود وجودهم الآن أو في حياة أولادك مستقبلاً..
سيدي وحبيبي رسول الله (صلى الله عليه وسلم )..كان نفسي أعيش في زمنه..
وجدي رحمه الله..كان نفسي يكون موجود يوم دخولي كلية الطب لأنها كانت أمنيته الوحيده ..ولم يكن يناديني بغير ..يا دكتوره..ولكنه مات قبلها بشهور ..وهذا إنتقص من فرحتي كثيرا وقتها..
وأيضاً الدكتوره عبله الكحلاوي..كان نفسي ولازلت نفسي أتعرف عليها عن قرب وأشارك في جمعيتها ..الباقيات الصالحات..لما لها من تأثير نفسي كبيرعليَ..
وكده يكون خلص كشف الحساب ..
وأمرر التاج إلى

نهى زيدان ..طائر حزين

مجداويه

عاشقة النقاب

حرة المداد

ولاء ..والقادم أجمل

منة الله..جاهينيات وعجباني

جميما

لورانس العرب

Tarek

أحمد أبو العلا

مع حفظ الألقاب

وبهديه لكل زوار المدونه ..


على فكره زوجي دخل ..وفي يده ..بوكيه ورد رائع وفيه الورد الجوري الأحمر إللي بموت فيه ..وكمان بيتزا..وتورته ..ياه دي هاصت خالص..يا ريت تشاركونا اللمه الحلوه دي.

36 من أمدوا قلمي مداده:

لورنس العرب يقول...

كل سنه وانتي طيبه يا مدام
أجيب لك هديه بس تجيبي حته من البيتزا

Whispers just for a Night يقول...

ساعات قليلة لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

Tamer Nabil يقول...

كل سنة وانتى طيبة

ربنا يوفقك ويحقق ليكى كل احلامك وكل خير ليكى ولااسرتك الجميلة

التاج دة حكاية انا بقللى 3 سنين بدون ومش عارف مين اللى طلعة فى الاول او اية السر بس اهو ماشى من يومها

كل تاج واننى طيبة

اتمنى اشوفك فى افكار حرة 1

تحياتى

لورنس العرب يقول...

يا سلام على التاج
أول مرة يجيلي تاج
عشان كده انا هاخده على رواقه باليل كده ولوحدي عشان محدش يايقني
معلش اصل دي اول مرة يوصلني حاجه من حد

طائر حزين يقول...

السلام عليكم

أختى العزيزة إيما كل سنة وانت يارب بألف صحة ويبارك فى عمرك لغاية متشوفى أولادك زى مبتتمنى. أنا قرأت التاج بتاعك و إجاباتك علية و عرفة انك مش هتصدقينى لو قلتلك حاجات كتير متشابهة فى أفكارنا صحيح مش فى كل الإجابات بس فى كتير منها

وبعتذرلك انى هتأخر شوية فى الرد على التاج مع إنى مش مصدقة نفسى ان وصلنى تاج بس لظروف خاصة يمكن لو اتراسلنا بيننا وبين بعض أقولها لك هتأخر شويه فى الرد

د/أبا يحيى وادم يقول...

السلام عليكم ورحمه الله وبركاته
كانت تلك زيارتى الاولى لمدونتك
الاول
كل عام وانت الى الله اقرب وعلى طاعته دوم
أسال الله أن يحقق لك كل احلامك وامانيك ويبارك لك فى اولادك وامانيك
بعد ما رايت بمدونتك اعدك انها لن تكون الاخيره ابدا ان شاء الله
أسال الله ان اجد لديك دائما كل جديد ومفيد
جزاكم الله خيرا

كلاكيت تانى وتانى يقول...

جميل يا ام البنين طل سنة وانتى طيبة وربنا يبارك فكل زوج بيعطى حق زوجتة ويعطيها ما تستحق ويسعدها اسعدة الله فالدنيا والاخرة
تحياتى ولكما كل السعادة والحب

Zianour يقول...

اولا كل سنة وانتي طيبة..
وانا سعيدة لان التاج جاء في وقته في لحظة جميلة جدا
ثانيا فين نصيبي من التورته والبيتزا والورد ...!!!
ثالثا: ربنا يديم عليكي الايان والحب والصحة وينولك كل اللي في بالك .آمين يا رب العالمين
شمعة منورة وقبلة وحضن كبير ليكي في عيد ميلادك!!
زيانور

ta2ta2 يقول...

كل سنة وإنتي طيبة وبصحة وربنا يحققلك أحلامك وبياركلك في أسرتك

عجبني إن جزء كبير من أحلامك مش لنفسك

ومتشكر علي التاج بس يا ريت حد يفهمنى يعني ايه تاج وجت التسمية دي إزاي عشان هتغاظ لو معرفتش معلش أصلي لسه ألف باء تدوين

كوارث يقول...

كل سنه وانتي طيبة
اجااتك على التاج ممتازة جدًا
ربنا يبارك فيكي ويباركلك

mohra يقول...

كل سنه و انتى طيبه و عقبال 100 سنه

حرة المداد. يقول...

سلام الله عليك أختي :
* كل عام وانت بخير والى الله أقرب وعلى فكرة عيد ميلادي أنا أيضا كان أول يوم في مايو
*طبعا جزاك الله خيرا على توريطة التاج والمشكلة ان الارقام اللي فيه قليلة جدا عن الحقيقة ويمكن أمد في الاجابات لحد ما تملوا بس بعد عدة أيام لاني مشغولة جدا
اجاباتك رائعة ويمكن في أشياء كثيرة مشتركة بيننا
دمت وأحباؤك بألف خير

الربان يقول...

تحياتي

اولا كل سنه و انت طيبة و بألف خير..حضرتك مواليد برج العذراء..

ثانيا...ربنا يبارك لك في نفسك و زوجك و اولادك...


ثالثا...اجاباتك جميلة و تعكس نفسيه صافية..

المركز الاسري...حلمت به كثيرا...لتثقيف
المقدمين علي الزواج..بمحاضرات في علم النفس ...خاصة علم نفس الطفولة..
التنشئة الاجتماعية...المشاكل التي قد تطرأ في بداية الزواج....تنظيم النسل
و اشياءمثل هذه...علي ان تكون للجنسين
و دون اختلاط....

اشكرك علي هذا الحلم الجميل الذي يعكس
حبك للخدمة العامة و اهتمامك بشؤون الاخرين لما فيه تنميتهم و تطوير حياتهم.


تحياتي و تقديري

Ema يقول...

لورنس العرب..
شكرا على مرورك


tamer nabil
بهديلك التاج..وشكرا على الزياره

Ema يقول...

طائر حزين
ربنا يديم المحبه ..قلقتيني عليك أرسلت لك إميلي لنتواصل وأطمئن عليك

Ema يقول...

د/أبايحي و آدم
سعيده بزيارتك وسعدت أكثر بعد زيارتي لمدونتك حيث وجدت مثل وقدوه لشباب مصر وفقك الله ورعاك

Ema يقول...

كلاكيت تاني وتاني
شكرا على زيارتك الجميله
لكن عايزه أقولك إن الحياه مش كلها ورد وبيتزا ..فيها كمان خصام وزعل بس شطارتنا إننا منخليش الزعل يأثر علينا وعلى علاقتنا بالأخرين
تحياتي

Ema يقول...

حبيبتي zianour
الله وصلني حضنك وإحساسك الجميل ده ..وربنا يديم المحبه ..ونصيبك في كل حاجه محفوظ وكمان نصيب زياد ونور
تحياتي ومحبتي

Ema يقول...

ta2ta2
شكرا على زيارتك وربنا يقويك على التاج


كوارث
بهديلك التاج وربنا يقويك


mohra
وإنت باألف خير يارب وبهديلك التاج إنت وكل قراء المدونه

Ema يقول...

الأخت الحبيبه حرة المداد
ربنا يكرمك ويحقق لك كل ما تتمنيه
وأنا سعيده لوجود أشياء مشتركه بينا ..وهي دي فوائد التاج ده إنك بتعرفي أشياء عن الآخرين وتقدري تحددي مين القريب منك
لك تحياتي

Ema يقول...

الربان
كل ما ذكرته حضرتك منضمن الحلم ..مأنا إن شاء الله هنزل بوست عن الحلم ده وهستنى آراءكم ومقترحاتكم...وياريت الزياره تتكرر
تحياتي

سبهللة عالاخر يقول...

كل سنه وانتى طيبة
وببنا ينولك كل امالك واهمها انك تحفظى القران الكريم
تحياتى لك
وبالتوفيق ان شاء الله
دى اول زيارة ليا وان شاء الله مش الاخيرة

د/أبا يحيى وادم يقول...

السلام عليكم ورحمه الله وبركاته
جزاكم الله خيرا جزيلا يا ام البنين على زيارتك لمدونتى المتواضعه امام مدونه حضرتك
وشاكر جدا جدا جدا على التاج ولكن حقا اعتذر عنه لانى حديث عهد بالتدوين وهدفى هو اسرة ملسمه ملتزمة معاصرة كما رايت فليس لى الحقيقه رغبة فى مساله الحديث عن نفسى وخصوصا انها تاتى اصلا من خلال سردى لابنائى ذكرياتى
أما بخصوص أضافة المدونة لديك
أن كنتى ترى أن فيها أفادة لاحد فلك ذلك
أسال الله ان يتقبل منا ومنكم
والسلام عليكم ورحمه الله وبركاته

Aymona يقول...

انا زعلان منك لانك ارسلتي التاج لكل زملائك في المدونة و نسيتيني انا .. انا عارف اني ما استحقش حتي طاقية ورق لاني لسه باحبو في موضوع المدونات ده و لكن أهو برضه اجبري خاطري و شجعيني .. المهم .. بقالي 13 سنة اعرفك و اكتشفت انك موهوبة جدا في سرد السيناريوهات القصيرة و ح احكم عليكي اكتر لما السيناريو يبقي من خيالك مش تجربة شخصية .. هايل يا ايما محفوظ

زوجك

الحافي " ده اسم المدونة و الله "

سكــر يقول...

كل سنه وحضرتك طيبه

عقبال 100 سنه يارب

على فكرا

زوجتى هى كمان بتموت فى الورد الاحمر

حالا هنزل اجيببوكيه

تحياتى اختى الفاضله

اخيكى
احمد سكر

Tamer Nabil يقول...

التاج دة خدتة 3 مرات لحد دلوقتى مش عارف اية حكايتة


خلينا نشوفك

تحياتى

mohamed يقول...

أم البنين وزوجة الانسان الكريم
وأنا أقرأ مدونتك شعرت بالامان والسلام
وحب يملاء أركان بيتك.
اللهم أجعل بيتهاأرضا للخير وأحفظها هيا وزوجها من كل سوء
أمين
محمد

لورنس العرب يقول...

أين الجديد يا مدام
من يوم 26 ومفيش جديد ليه
أين ذهبتي يا ام البنين

Tamer Nabil يقول...

السلام عليكم

ازيك اختى العزيزة

انا رديت على التاج اللى حضرتك مررتى ليا فى ردك عليا

اتمنى اشوفك عندى


تحياتى

Soooo يقول...

لفظ كلمة تاج بالانجليزي يعني علامه .. والغرض منه زي مابيتعمل في المدارس بتاعة بلاد بره ان كل طالب بيبقى في يوم عليه علامه .. يشرح اللي عايزه ويوقول احلامه ويتكلم عن نفسه .. نوع من انواع التواصل مع زمايلو ومدرسينه

لكن تقريبا اللي نقلو نقلو من غير مايشوفلو اي مسمى عربي وراح يادو ب قالبه من
TAG
لـ تاج
----

اجابتك بسم الله ماشاء الله بتدل على انك شخصيه متدينه ومحترمه جدا
واحلامك جميله وبتعكس نفس صافيه وحلوة قوي

امانه عليكي يادكتوره لما تعملي عمره .. تدعي بضهر الغيب لوالدتي ان ربنا يرحمها

وربنا يكرمك ويسعدك ويوفقك ويرضيكي دنيا وآخره يارب



سلامووووووووز

جُمَان يقول...

السلام عليكم ..
كل عام وانت بخير يا رب :)

بس سؤال سريع .. حضرتك خالتو أم البنين الي أعرفها في الوعد وعمرو خالد صح؟!

يا رب تكوني هي ..
"طمنيني عنك يا خالتو .. مشتاقة لك"

أحبك في الله
"جمانة القدس"

Eman Eltaher يقول...

كل سنة و انتى طيبة يا إيما

دى أول زيارة لمدونتك و انا سعيدة انى اتعرفت عليها

ربنا يباركلك ف اسرتك ان شاء الله
و يديم عليكم نعمة السعادة و كل اللى تتمنيه

فين بقى نصيبى من البيتزا ؟؟؟؟؟؟؟؟

صيد الخاطر يقول...

ماشاء الله تبارك الله
ربنا يبارك لكما ويجع بينكما دائما على خير وطاعة
أسعدني قراءة هذا البوست
ربنا يمدك بالصحة والعافية وطول العمر
وينفع بيكي الدين

monaliza يقول...

كل سنة وانتى طيبة وعقبال 110 سنة وانتى طائعة لله ويارب تحققى كل احلامك

nonoymm يقول...

السلام عليكم حبيبتي
ربنا يحقق لك كل احلامك يارب
ويوم ميلاد سعيييييييد
والعام القادم اكثر طاعة واكثر تقربا له
تحياتي

لورنس العرب يقول...

أكرر السؤال تاني
أين الجديد يا أم البنين؟؟؟