الخميس، 26 يونيو 2008

حفلـــة تخرج كــــي جــــي 2



إتفقت وأبو البنين إننا نعمل حاجه ترجع لنا أيام الذكريات الجميله .
إتفقنا نجيب ألبومات جديدة ..وننظم فيها كل صورنا وذكرياتنا الموجوده هنا وهناك ..وبكل همه ونشاط جمعت كل الصور الموجوده عندنا في ألبومات مختلفه... بعضها جديد ...وبعضها مر عليه زمن طويل ..وجمعت كمان الجوابات والحاجات والمحتاجات ..وكل ما له صله بأيامنا الماضيه الجميله ..فكل صوره لها ذكرى ..وكل جواب له حكايه..
وفي وسط الصور إستوقفني صورتين زي العسل ..كان لي معهما مشاعر فياضة ..وأحلام كبيرة ..وكمان شوية دموع..
الصورة الأولى ..لإبني الكبير زياد يوم تخرجه ..أيوه تخرجه مالكم مستغربين ..بس تخرجه من كي جي 2 أي والله ..كي جي 2...أصله في مدرسه من إياهم ..الإنترناشيونال ...والمدارس دي زي ما إنتوا أكيد عارفين بتحاول تعمل شوية حاجات كده تضحك بيها على الأهالي الغلابه إللي بيدفعوا دم قلبهم علشان أولادهم يتعلموا كويس ..ويتكلملهم كلمتين إنجليزي ...يعني حفلة كده شيء لزوم الشيء.
المهم إني في اليوم ده كنت فرحانه جداً..وزي ما يكون إبني هيتخرج من الكليه بجد..وخاصة إنهم لبسوا الروب الأسود والكاب بتاع التخرج..وعلى أنغام الموسيقى ساروا بالخطوه العريضه ..بالخطوة الجريئة زي الطاووس المعجب بنفسه....وكأنهم فتحوا عكا ..وطبعاً كل الأمهات وأنا منهم فرحانين جداً بالمشهد المهيب ده..في الحقيقه أنا دموعي نزلت...وده طبعاً نتيجة لطبعي النكدي..ودموعي القريبه جداً..المهم إن دموعي نزلت لأني تخيلت يوم تخرجه من الكليه ...وعشت اللحظه دي كأنها حقيقه وشايفاها ..ومش عارفه ليه إتخيلت كمان يوم فرحه ..وهو لابس البدله وزي القمر في الكوشه..وطبعاً هو كان واصلوا إحساسي ده وهو على المسرح وكان مبسوط جداً.
أما الصورة الثانيه فهي لعاصم ..يوم تخرجه هو كمان من كي جي 2 ...ولكن مع عاصم كنت شاعره إن في فراشه بتطير ..مكسوف..ومش عارف يعمل حاجه.. وكل شويه يشاور لي من مكانه على المسرح علشان أشوفه طول الوقت ..عاصم طفولي شويه ..وعنده كمية براءه جميله..وجالي إحساس إنه هيكون شخصيه بتوزع خير على كل الناس ...مش عارفه ليه ..بس ده كان إحساسي ..ويا رب يكون كده..ولما نزل من على المسرح كان مكسوف جداً ووشه زي التفاح الأحمر..أخدته في حضن كبير ..وكنت فرحانه بيه جداً.
يارب تكونوا عشتم معايا اللحظات الحلوه دي ..
وعقبال أولادكم..

16 من أمدوا قلمي مداده:

mohra يقول...

ربنا يخليهم لك و تشفيهم متخرجين من الجامعه
بس بلاش طب
:)

فاتيما يقول...

طبعاً عشتها معاكى و بتمنى أشوف يوسف كدا
عقبال ما تفرحى بتخرجهم من الجامعة بتفوق و تحضرى الماجستير و الدكتوراة و تشوفيهم عرسان و تشيلى عيالهم
إنتى مش نكدية إنتى عاطفية و قلبك بيتحرك علطول مبيكتمش فى نفسه
و ربنا يحرسهمولك يا رب من كل شر
و يكونو السبب فى دخولك إنتى و أبوهم الجنة
تحياتى يا حبيبتى

بنت الصالحين يقول...

ماشاء الله عليهم

ربنا يخليهوملك وتفرحي بيهم وتشوفيهم في الكوشه فعلا

ده مش طبع نكدي والا كل الستات تبقي نكديه
:))))


بس دي مشاعر امومه جميله

ربنا يباركلك فيهم يارب

مجرد خواطر يقول...

ما شاء الله ربنا يبارك لك فيهم يا رب و تشوفيهم عرسان زى القمر وعقبال محمد يا رب ولا اعتقد انه هيكون من نوع عاصم لأنه من الان بيغضب ويزعل وله شخصية قوية. وانتى مش نكدية انتى رقيقة اوى

Mony يقول...

ماشاء الله اللهم بارك

ربنا يخليهملك يارب و تشوفي ولادهم هم كمان و هم متخرجين من kg2 برضه

احمد أبو العلا يقول...

اللهم بارك فيهما وصلتنى دعوتك الكريمة بس انا كنت فاكر انكم عايشين فى السعودية على العموم اذا مالحقتش الحفلة اهديهما تدونتى الأخيرة وهى تصميم "ماشالله" علشان تحرسهم من العين
تحياتى

سبهللة يقول...

بارك الله لكى فيهما
وفكرتينى بإياد ابنى لما اتخرج برضه من كى جى 2 بنفس الروب الاسود والكاب
لدرجة انى حاطة صورة تخرجه على يمين المدونة طول الوقت
اللهم اقر اعيننا بأبناءنا
اللهم اجعلهم ابناء صالحين
قولوا امين

Mohamed Dawod يقول...

ربنا يخليهم لك وتفرحى بيهم انتى وأبو البنين كمان وكمان....ويارب أشوف ابراهيم ويحيى زيهم كده متخرجين من كى جى 2 برضه.....أنا انشاء الله أدخلهم برضه مدرسه انترناشيونال مادام بيضحكوا علينا ويفرحونا كده

Neveen Ali يقول...

عشت احساسك الجميل يا ام البنين يوم تخرج منه بنتى من الكى جى و اتمنيت فى كل لحظة من عمرها افرح بيها
سبحانه من زرع حبهم فى قلوبنا لنحيا بهم و لهم و نتحملهم ايضا
غاليتى
بارك الله لك فى اولادك و جعلهم فرحة قلبك مدى الحياة
خالص حبي

الربان يقول...

تحياتي

الف مبروك لزياد وعاصم...و ان شاء الله
يحققوا كل ما يتمنيان.

حقيقي صور جميلة...و ذكري اجمل...و علي فكرة ال KG لها نفس مشاعر التخرج
من الجامعة لانها بتكون اول مرحلة...و فرحانين باولادنا.

جعلهما الله قرة أعين لك و لزوجك.

تحياتي و تقديري

الميكروباص يقول...

يا سلاااااااااام
ولله زي الفل
عقبال حفلة الدكتوراه
بس اوعي تدخليهم كليه علوم

عاشــــــ النقاب ـقــــة"نونو" يقول...

السلام عليكم
يارب بارك ويارب يخلي
وتعيشي لما تحضري حفل تخرج احفادهم كمان
تحياتي

أ / أحمد عبد المنعم يقول...

بسم الله الرحمن الرحيم
أم البنين المحترمة
سعدت بمرورى على مدونتك
ومدونتى " أمـــــى " قد تفيدك كأم للبنين وقد تفيد كل أم
لذا أدعوك لزيارتها
http://ommee.blogspot.com
كما أستأذنك فى دعوة زائريك إليها

غير معرف يقول...

السلام عليكم ورحمه الله و بركاته

انا ايان من اعضاء فريق " حبا فى رسول الله "
كنت محتاجه انك تراسلني علي المايل بتاعي
eshelbaia@gmail.com
عشان ااقدر اتكلم معاكي عن الحمله " حبا فى رسول الله "
محتاجين كتير جدا عشان الحمله تقف علي رجلها و تاثر في حياه الناس بالايجابان شاء الله

حستناكي جدا : )

موناليزا يقول...

ربنا يبارك فيهم ويحميهم وتشوفيهم يارب احسن الناس ورجالة بجد
متشكرة جدا على دعوتك الغالية ليا بحضور حفل تخرجهم الغالى وعقبال ماتعزمينى على فرحهم وانتى بصحة وسعادة

مسلم يقول...

عاااااااااااااااااا
عاااااااااااااااااا
عاااااااااااااااااا
مش قادر أمسك نفسي بجد كنت هعيط
فكرتيني بيوم تخرجي اللي مكنتش عايزه يحصل ...
ربنا يخليهملك وتشوفيهم تجار حديد زي عز...