الأحد، 17 أغسطس، 2008

بالأحضان يا بـلادي


معكم متحدثتكم إيما من على متن الطائرة البويينج 707 المتجهة إلى القاهرة بعد غياب دام
أكثر من سنة ..على يميني عاصم ..وعلى يساري رامز ..وبجانبه أبو البنين ..أما زياد فعلى الجن
الجانب الآخر عامل فيها راجل وقعد لوحده ..
إللي عايز يضحك يقعد جنب عاصم ..طول الوقت بيرسم خطته طول الأجازه ...
وكل شويه يقول ..يا خبر أبيض ده تيته هتقطعني من البوس ...
وإللي عايز دماغه توجعه من الأسئله والمناقشات يقعد جنب زياد ..الراجل الغلبان إللي
أسعده حظه وكان مكانه جنبه أكيد جاله صداع ..غلبان والله ..
أما بقى إللي عايز يتبهدل من الشقاوه والعفرته فيقعد جنب رامز باشا ..هيقع عليه شاي ..وإحتمال مهلبيه ...وعصير ميضرش...كل ده وأبو البنين نايم..أو عامل نفسه نايم ...
..............................................................................................
كل البنات والستات القمرات خارجين من مطار السعوديه زي الفل ...حجاب إيه ..
وعبايات إيه...أي نعم عبايات شفتشي حبتين ...المهم إن مفيش حاجه كده ولا كده ..
وفي الطياره كان ورايا طقم عبايات جميل ..وفجأه بلتفت ورايا بعد وصولنا لمطار القاهره
و ياريتني ما إلتفت طقم العبايات إتحول بقدرة قادر لطقم استرتشات وبديهات وألوانات....وكأننا وصلنا لبلد العري والفسوق ..اللهم ارحمنا..
إللي بيضايقني هو الكذب على النفس وخداعها ..
عجبني جدا بنات صغيرين في الثانويه العامه ..كانوا خارجين من مطار جده بدون عبايات بلبسهم وحجابهم العادي وإللي بيلبسوه في مصر..ومع صغر سنهم إلا إنهم صادقين مع نفسهم ..
.................................................................................................
في إنتظار وصول الشنط ...نفسي توصل بسرعه علشان أطلع بسرعه وأحظن أمي وأبويا وكل إللي في إنتظاري ..علشان أحضن مصر كلها...
..................................................................................................
الرحله من جده للقاهره أخدت ساعه ونصف ...والرحله من المطار للبيت أخدت ساعه ونصف...سبحان الله .
.................................................................................................
زوجتك إبنتي......البكر الرشيد على الصداق المسمى بيننا
وأنا قبلت زواجها
كان ده مشهد كتب كتاب أخويا ...أكبر إخواتي الشباب ..كان مشهد جميل جداً..وطبعا الطبع النكدي إشتغل والدموع نزلت لما شفته عريس زي القمر..ربنا يبارك له في حياته وفي عروسته.
..................................................................................................
بعد سنه بعد عن مصر ووحده وتعب مع الأولاد قررنا نريح أعصابنا شويه في منتجع في العين السخنه ...وصلنا وعجبنا المكان جداً ومنينا نفسنا بكام يوم حلوين ..عدَا اليوم الاول والتاني بسلام
وكنت مبسوطه لأن مفيش في المكان بكيني ولا حاجات من دي ..اللهم بعض البكيني إللي سرعان ما إنزوى في مكان بعيد عن المحجبات والمنقبات الوحشين...والمايوهات الموجوده كلها شرعيه ..وبغض النظر عن موضوع شرعيه ده ..لكن ماشي..
لكن يا فرحه ما تمت في اليوم التالت والاولاد لسه نازلين البسين فوجئنا إن سعادتي ممنوعه من الجلوس على البسين ...وطبعا مش علشان مطلوبه من جهات أمنيه ..لكن علشان سيادتي منقبه
والمنقبات ممنوعين من التواجد على البسين لأن ده مظهر غير حضاري...تصوروا الحجاب بقى مظهر غير حظاري ..والبكيني هو المظهر الحضاري....وبعد السؤال عن السبب إتضح إن
مجلس الإداره إجتمع وقرر القرار العظيم ده ..والأدهى من كده إن القرار ده كان بناءً على شكوى من نزلاء مصريين مش أجانب لكنهم تبع حزب البكيني..حسبي الله ونعم الوكيل
وطبعاً أبو البنين سمع الكلام ده ..والعرق الصعيدي ظهر ..وإعتبرها إهانه إنهم يحددوا إقامتنا بسبب نقابي وقرر الرحيل فوراً ..بعد وصله من التبكيت في الإداره ومجلس الإداره ...
في الحقيقه تصورت إن الأولاد هيضايقوا على أجازتهم إللي ما كملتش ..لكني فوجئت برد فعل عجيب منهم ....فوجئت بهتافات تحيه لوالدهم ..وكأنه مرشح نفسه لمجلس الشعب
جدع يابابا...راجل يا بابا ...بينا على مصر يا بابا ...
سبحان الله على بلدنا ....ولا كأننا في أمريكا.

تحديث

على مدونة فرنسا والرايق إتنشرت لي تدوينه ضاحكه ياريت تشرفوني هناك يمكن أقدر أرسم البسمه على وجوهكم...التدوينه بعنوان شبكة الهنا

http://faransaraayek.blogspot.com/




35 من أمدوا قلمي مداده:

مع اصرارى يقول...

حمد الله على السلامة
ومعلش ما تزعليش
يا ستى افرحى وهيصى
كل سنة وانت طيبة
ويا رب اللى جاى يكون أحسن

مع أبهج تحية
السلام عليكم ورحمة الله

ahmed_k يقول...

أولا حمدالله علي السلامه
ونورتوا بلدكم

وثانيا ألف مليون مبروك لأخوكي وربنا يسعدو دايما ويوفقه في حياته

تالثا أضم صوتي لكل من يقول حسبي الله ونعم الوكيل في اللي لا يقدر الإحتشام ويعطيه المكانه اللائقه بيه
ويفضل العري والإبتذال الذي لم يجلب على بلدنا إلا كل الشرور والمآسي
هؤلاء يا أختي وأمثالهم هم المترفون الذين وصفهم الله بقوله
(وإذا أردنا أن نهلك قرية أمرنا مترفيها ففسقوا فيها فحق عليها القول فدمرناها تدميرا)
نسأل الله أن يلطف بنا وببلدنا
فهم ليسوا قياسا علي شعبنا
ونسأل الله العفو والعافيه

وأحمد الله ان أصبح النقاب منتشرا بشكل كبير
فها هي محاولات الفاسدين جائت بعكس مرادهم ربنا يريحنا منهم ومن اللي مقويهم ومديهم السلطه لذلك

وتقبلي خالص تحياتي

ومنوره مصر يا أم البنين
وحللتم أهلا ونزلتم سهلا

عصفور المدينة يقول...

حمدا لله على سلامتكم وبارك الله في هؤلاء الأبناء الذين وعوا الهجمة مبكرا
ومبارك للعريس

بطوط حبوب يقول...

انا بس عايز احيي عاصم ورامز وزياد

على موقفهم

ربنا يحميهم ياااااااارب

فاتيما يقول...

إيما
ألف حمدلله ع السلامة يا حبيبتى
و الله الزعارير دول عايزين يتهروا بوس بس طبعاً مينفعشى
إبقى بوسيهمولى بالنيابة عنى
أصل مدام فيه حرية شخصية كدا
إشمعنى البيكينى بس يعنى
و النقاب لأ ؟؟
كل واحد حر بقى فى لبسه طالما المبدأ موجود و هوه الحرية
إنما يظهر إن كل حاجة بمكايلين
إيش حال ما كنا فى مصر
اومال الناس اللى فى الدول الغربية يعملوا إيه بقى ؟؟
المهم الف مبروك على كتب كتاب اخوكى
يا رب أيامك كلها تبقى افراح
و يا رب ألحق أشوفك قبل ما ترجعى السعدوية
تحياتى يا حبيبتى
و سلامى للعيال الدماغ دى

احمد ابوالعلا يقول...

حمد لله على سلامتكم ايما والحافى والزعارير وما تصفينه هو حدوتة مصرية معتادة ولا حول ولاقوة الا بالله
اتمنى لكم اجازة سعيدة

وجهة نظري يقول...

طب يعني حضرتك نازله مصر أم الدنيا بالنقاب؟ دا كلام برضه؟

أمال فين التحرر والتعليم وحرية المرأه؟

لأ بجد غلطانه. وبعد دا كله بتساوي نفسك بالغزال أم بكيني؟ يعني خلاص حبك النقاب علي البيسين؟

يا شيخه، فكيها علي نفسك كده وبلاش العقد دي، يعني إنتي حتفهمي في الدين وحتخافي من ربنا أكتر من مجلس الإداره؟ دا مجلس إداااااره... يعني مش اي كلام. ناس فاهمه ودارسه.

لأ وبعدين جوزك وعيالك إتحمقوا. بدل ما يروح يشتريلك بكيني كده ويتبسط بيكي وإنتي وسط الرجاله يقوم يتحمق ويصمم يمشي.

أهو دا التخلف بعينه، والفكر الوهابي المستورد والدخيل علي مصرنا الحبيبه. أدام الله عزها وأطال في عمر رئيسها .... هاي هي.

تحياتي.

أحمد أبو القاسم يقول...

السلام عليكم
مشكلتنا أن مصرنا تغير وجهها
الفساد أصبح يعشش فيها
ويضرب بجذوره أعماق تربتها التي (كانت خصبة)
أنها مصر التي كانت تنجب رجالا قبل أن تتوقف (مؤقتاً)
ولو أنها كانت تنجب رجالا صدقوا ما عاهدوا الله عليه
لما رأت أم البنين ما رأت
فمن هن الكاسيات العاريات في شوارعنا الجميلة
ألسن أخواتنا وزوجاتنا وبناتنا
ألسن أخواتنا في الدين والدم والوطن

إن الفساد أفرز تمعناً في التبرج
الذي يمثل قضية دينية أخلاقية
فالأمم الأخلاق ما بقيت
ولن أخط خطبة عصماء فالحجاب والاحتشام فرض بنص القرآن
لذا فلا طائل من الحديث عن أمر مفروض
لكن الغريب حقاً
أن التبرج في الجاهلية كان فتحة الصدر الصغيرة فقط التي كانت عندما تنحني المرأة تكشف عورتها
قلتها لأحد أصدقائي فرد :- أأنت تهذي؟
فانزعجت وسألته :- لماذا ؟
فرد مسرعاً :- إذن ماذا نسمي مظاهر التبرج الآن ؟
فأعجز عن الرد تماماً ويلجمني السؤال

وأسال نفسي بعدها إذا كان النقاب مرفوضاً (إجباريا)
لأنة ليس فرضاً وأنه فضلا

فلماذا يصبح العري والفساد مباحاً

ولماذا نضع الثاني رغم أنه مخالف للشرع والعادات والتقاليد وحتى للفطرة في نطاق الحرية الشخصية

ونضع الأول رغم أنه الأهم والمفروض بنص القرآن والسنة والعادات والتقاليد والفطرة ودفع المفاسد في خانة الرفض والمصادرة

أليس ازدواجا يذهب العقل
أليس منطقاً فاسداً يضيق الصدر

أين هي الحرية وحقوق الإنسان
أهي للمفاسد فقط ؟


هوامش :-
قال لي أحد أصدقائي من سافروا إلى مارينا هذا الصيف لقضاء الاجازة أنه وبعد أحدى الحفلات الساخنة على أنغام الدي جي بالمايوهات الساخنة تحت الشمس الساخنة قام عدد كبير من بنات ( الـ... ) بخلع مايوهاتهن والنزول الى الماء ليلعبن ويمزحن وسط ذهول الجميع وهو ما جعل الشباب الحاضر ينتهز الفرصة ليلتطق صورهن بهواتفهم المحمولة ومنهم من نزل الماء خلفهن ليلعبوا سوياً ولم أصدق صديقي حتى كتب أحد الزملاء في صحيفة الفجر تأكيداً لما سمعته .. اين نحن ؟ وماذا يحدث ؟ ولما يطلقون على هؤلاء (الـ ...... ) أولاد الذوات أو بنات الطبقة الراقية .. أي ذوات هل يقصدون ذوات الاربع مثلاً ؟ وأي رقي هل هو الرقي مساوي للعري ؟ إذن نحن لسنا راقيين ولا نريد .
ولكن لا عجب فمارينا وشرم الشيخ والغردقة وغيرهم لم يعد لنا مكان فيهم إن أردنا أن نحافظ على ما تبقى لدينا من عقل .. فما يحدث من أبناء تلك الطبقة ( الـ ..... ) تخطى كل حدود العقل .. لكن القادم أسوأ إن لم يكن هناك حل جذري وإن لم يعود وجه مصر الحقيقي .. مصر التدين والاحتشام .. مصر الاسلام المعتدل .. مصر التدين في الجوهر والمظهر معاً .. وإن لم تصدقوني فاقرؤوا إن شئتم قصة د. أحمد خالد توفيق "يوتوبيا " .

أسف على الاطالة
وشكراً لكم جميعا

عالم حبيب يقول...

حمد لله على السلامة .. وعقبالنا يارب

أد ايه احساس جميل لما الواحد بيرجع بلده .. رغم كل المشاكل اللي فيها .. لكنها احلى بلد في العالم .. أجازة سعيدة

وألف مبروك للعريس .. بارك الله لهما وبارك عليهما وجمع بينهما في خير

وتحياتي لأبو البنين على هذا الموقف الشجاع .. وتحياتي للبنين جميعا .. ربنا يحفظهم يارب ويتم نشأتهم على الدين نشأة صحيحة اسلامية مباركة

وهنيئا لكي السير على طريق خديجة وحفصة وعائشة وأمهات المؤمنين .. هناك محاضرة جميلة للشيخ محمد العريفي بعنوان " القابضات على الجمر " انصحك بالاستماع اليها .. اسأل الله لنا الثبات والفردوس الأعلى

أخوكم : حبيب

حزيــــــــــــــــــن يقول...

حمدا لله على سلامتك
مادمت فى مصر نطمع ان تشاركينا حفلة مدونات مصرية للجيب

mony يقول...

اولا حمد الله علي السلامة يا ام البنين انت و ابو البنبن و البنبن كمان



بس احب اقولك ان معظم اللي بيبدلوا العبايات بالعري هم من البلد اللي جاين منها اساسا
لانهم هناك بيلبسوا الحجاب عادة مش عباده و طبعا جماعة الامر بالمعروف ليهم يد في انهم يجبروهم علي الحجاب (ربنا يجازيهم خير)
فعلشان ده مابيفرقش معاهم

ثانيا :للاسف موضوع منع المنتقبات لدخول اماكن كتير منها قاعات افراح و سمصايف و ساعات فنادق كتر اوي
و ده بسبب ان ولاد الحرام ماخلوش لولاد الحلال حاجة
يعني للاسف في ناس بتتخفي في النقاب علشان يعملوا بيه مصايب وللاسف السمعة اثرت علي المحترمين منهم بس

اما ثلثا :فمبروك لاخوكي و زوجته
بارك الله لهما و بارك عليهما و جمع بينهم في الخير

الدفاع يقول...

انا لو منكم والله ماخرج ولا بالطبل البلدى واعملهم مهرجان الصح مايمشيش اللى يمشى الغلط اللى على حق يقلع اللى فى رجله ويدى بيها على راس الباطل
هى كده اسف على الاسلوب اصلى بجد اتنرفزت
حسبنا الله ونعم الوكيل بس المكسب فى الموقف ده ان ربنا طمنكوا على الاولاد وعلى فطرتهم السليمه
تحياتى

appy يقول...

حمد لله على السلامه والف مبروك لاخوكي

ومعلش انا شوفت الانيل من السعوديين فى مطار ماليزيا مع انها مسلمين
اما البيكني
فعلي راى المثل بيكينى ولا تغديني هههههههههههه

dodda يقول...

حمد الله على السلامه
اول ما عرفت انك روحتى العين السخنه كنت حسألك فين بالظبط طالما مافيش بيكينى...
بس بقى بعد المؤتمر الشعبى بتاع بابا مبقاش ليه لزوم

انا نفسى اروح السعوديه علطول
وهو بقى قاضل ايه فى مصر مصرى؟؟؟؟؟

Zianour يقول...

حمد الله ع السلامة
وسلموا لي على مصر سلموا لي

على فكرة انا باروح البسين هنا ف كندا عادي جدا والعيال بتعوم فيه ولا الهوا رغم ان فيه بيكيني برضه

ربنا يسعدك ومبروك لابو الشباب الارتباط

Zianour يقول...

على فكرة فيه منقبات برضه كتير ف كندا
بس عادي التعايش بين الجميع جميل جدا

الربان يقول...

تحياتي


حمدا لله علي سلامتك...و سلامة اسرتك بالوصول الي مصر الغالية.

بالنسبة لموضوع العبايات...فعلا رايت
ذلك مرات عديدة خلال رحلات الحج او العمرة....بمجرد ان يغلق باب الطائرة
و تسير علي الممر تمهيدا للاقلاع...تخلع العبايات..و يظهر الجينز...و البديهات
انفصام غريب في الشخصية.

بالنسبة لما حدث في العين السخنه....بعض
المنتجعات في شرم و الغردقة لا تسمح بدخول المصريين اصلا....سواء منقبات او سافرات...رجال او نساء....

الف مبروك عقد قران اخيك...بارك الله لهما وفيهما....


تحياتي و تقديري

شفقة هانم واحسان بك يقول...

نورتينا ونورتى مصر كلها وحشتينى جدا جدا كده بردوا تقطعى مرة واحدة انا زعلانة
اما بخصوص اللى شفتيه فى العين السخنة فده بقى العادى طبعا البكينى بقى هو المظر الحضارى امال وابقى تعالى عندى وشوفى هى دى مصر يا هبلة

شــــمـس الديـن يقول...

بجد بجد ممنورة مصر
و عودا احمدا بيكي انت و بالاسرة الكريمة كلها

و حيث بقي انك في القاهرة فياريت بجد تيجي حفل المدونين بتاع ساقية الصاوي

يوم السبت 23 اعسطس

ان شاء الله اشوفك و اقابلك و ياريت تعرفي تيجي :)

و القادم....أجمل يقول...

حمدلله على السلامه

نورتي يا جميلة

و ألف مبروك لأخوكي

ربنا يسعدكم جميعا يارب

:)

سبهللة يقول...

حمدلله على السلامة
انا جالى من كام يوم على الموبيل رقم اتصل مرتين بس مالوش نمرة
كان مكتوب no number
هل دة كان انتى وبتتصلى من رقمك السعودى؟؟
ثانيا بالنسبة للبيت انا حاليا مش موجودة فى البيت انا موجوة فى بيت اخى فى 6اكتوبر اول ما ارجع هاشوف النمرة اللى اتصلت منها واكيد هاتصل بيكى
او الاحلى انك تبعتى لى ميل فى ارقامك وانا هاتصل بيكى
بس مش قبل يوم السبت اللى جاى
سلام عليكم

المدون / أحمد كجول يقول...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق ,, كما أرجو المشاركة في الاستفتاء

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/

شفقة هانم واحسان بك يقول...

انا مبسوطة اوى اوى وسعيدة بمعرفتك جدا جدا اتمنى نكون اصدقاء

قوس قزح يقول...

ايما
انا معرفش انك كنتى خارج مصر
اولا حمدلله على السلامة و اجازة سعيدة لكى يارب انتى و الاسرة الجميلة

ثانيا
انا بشكرك على مشاركتك معنا يوم البؤجة و سعيدة بمعرفتك جدا و حسيتك انسان قريب من القلب

جزاك الله خير انتى و اسرتك

واحــد ميــت يقول...

اول زيارة لى فى المدونة واول تعليق لى فيها

ماشاء الله على المدونة جميلة جدااا

حمدالله على السلامة ومبروك لاخوكى كتب الكتاب
اما موضوع انهم منعوا المنقبة فدا امر عادى فى البلد دى

اى حاجه صح لازم تتمنع
تقبلى تحياتى بكل ود
ادعوكى لزيارة مدونتكم الجديده
http://agml-qlb.blogspot.com/

NilE_QueeN يقول...

حمد الله على سلامة الجميع

افضل الاشياء ف بلدنا مبقتش لينا

متزعليش

شفقة هانم واحسان بك يقول...

انا فرحانة اوى اوى انى اتعرفت عليكى وكمان الاولاد زى العسل ربنا يخليهملك
يارب نفضل علطول اصدقاء
شفقة

لورنس العرب يقول...

شكلك مشغوله في الاجازه اليومين دول

Sherif يقول...

لك حق .. الصدق فى كل شئ جميل ومطلوب

لكن ربما كانوا مضطرين فى بلادهم لهذه ..

أما مسألو العين السخنة فهو موقف مؤسف جدا

يا مراكبي يقول...

أولا حمد الله على سلامتكم ومبروك للأخ العزيز

ثانيا .. بجد موقف النقاب ده يكسف .. ده حتى أقل دواعي الحرية الشخصية إنهم يعدلوا بين الحريات المختلفة .. مش يسيبوها للبكيني والملتزمات لأ

لله الأمر من قبل ومن بعد

جميل جدا البوست الفكاهي المنشور هناك .. عجبني جدا جدا

(احمد سكر ) يقول...

السلام عليكم ورحمة الله وبركاته

ازيك يادكتوره

كل سنه وحضرتك طيبه

ماشاء الله على اولادك عجبنى جدا موقفهم لما عرفو ان باباهم لغى الاجازه علشان مبادئه

ونعم التربيه والاخلاق

سعدت جدا بحضرتك يوم توقيع حفل الكتاب

وان كان مااسعدنيش الحظ ان نتكلم سويا

ولاكنه سلاما عابر

تحياتى اختى الفاضله

ادام الله عليكى نعمة الايمان


اخيكى

احمد

اااه صح استنى

مممممممممم

هى الطياره كانت بوينج 707

انتى مكنتيش جايه على طائرات مصر للطيران ؟؟


لان الطراز دا اتلغى من الشركه من 10 سنين تقريبا


بعد كدا يادكتوره ابقو نفعونا


كل سنه وحضرتك طيبه

احمد سكر

عروسة ننوسة يقول...

حمدالله على السلامة نورتى البلد كلها

شفقة هانم واحسان بك يقول...

وحشينا البنين مغلبينك ولا ايه

إيما ( أم البنين) يقول...

كل زواري إللي شرفوا المدونه
سعدت بتعليقاتكم التي تثري المدونه ..وعذرا لعدم مقدرتي في الرد عليكم لإنشغالي بالمذاكره ..أسألكم الدعاء
تحياتي

تسنيم الريدي يقول...

السلام عليكم
مدونة قيمة
لي عودة باذن الله