الاثنين، 5 مايو 2008

مناقشه في المطبخ

إيما تقف في مطبخها الذي تقضي فيه وقتا ليس بالقليل, لتحضر الغذاء قبل وصول زوجها ,يدخل عليها زياد (إبنها الأكبر ) مسرعاً
ماما والنبي تسامحيني المر ه دي وتخليني ألعب على الكمبيوتر .
مـتـقـسـمش بالنبي يا زياد ...ده حرام يا حبيبي
..
حرام لـيه ؟
علشان لازم لما نقسم... نقسم بالله عز وجلَ
..
بس أنا مأقـسمـتش يا ماما ..أنا بتحايل عليك ...
وبدل ما أقولك علشان خاطري بقولك علشان خاطر النبي عليه الصلاه والسلام ..
يعني هو أحسن ولا أنا ...ده نبينا يا ماما...
تركت إيما ماكانت تفعله ونظرت إلى إبنها الذي لم يتعدى عامه التاسع وهي مذهوله من منطقه الفلسفي ,ومناقشته ورده الذي أفحمها لبعض الوقت..
وتذكرت قول (محمد صبحي ) في مسلسل عائلة ونيس : أننا يجب أن نربي أنفسنا قبل أن نربي أبناءنا .
الواد ده كبر للدرجه دي ؟ ردي بقى عليه يا ست إيما ...
وأخذت تشرح له إيما ببساطه ليه القسم بغير الله حرام ,وإن لفظه ده قسم مش محايله زي هو ما بيقول ..
خرج زياد وتركها تفـكر في صعوبة تربية جيل الإنترنت ...وإنها لازم تكون مستعده لأي مناقشه من النوع ده ..
ِشوفت بقى ياست إيما تربيتهم مش ساهله إزاي ...
وتكمل إيما تقشير حبات البطاطس وهي تردد ...
اللهم أعنا على تربيتهم تربيه صالحه ترضيك عنَا...

5 من أمدوا قلمي مداده:

الميكروباص يقول...

ولله انا كنت راكب المترو، وراجل قاعد امامي وماسك ابنه الصغير، الولد فضل يسأل في حاجات تعقد، قاله ليه المترو فيه سلوك من فوق، وهو لازم يمشي بالكهربه ولا لأ، طيب وافرض مفيش كهرباء ايه اللي يحصل، طيب وليه فيه كذا سلك مع بعض، طيب وليه العربيات في الشارع مش بتمشي بسلوك من فوق زي المترو كده،،، بصراحه انا أشفقت على الرجل من كثرة الاسئله وصعوبة الاجابه عليها، تربية الاولاد صعبه، لأن معك صفحه بيضاء وانت اللي بتكتب فيها من الأول لتخرج بني آدم كامل إلى الحياه، أعانك الله على أولادك وبارك لك فيهم

Zianour يقول...

هههههههههه
والله انا ضحكت ضحك اصله فكرني بابني الكبير نور اللي ما بيفوتش ولا سؤال وانا (للأسف) اللي باشجعه على كده غاوية بقى ةوجع قلب بس عندك حق الاجيال اختلفت تماما ولازم نربيهم لجيل تاني خالص على فكرة فيه مقولة لسيدنا عمر بيقول فيما معناه لاتربوا اولادكم كما تربيتم لانهم خلقوا لزمن غير زمانكم
يللا ربنا يعينك
على فكرة انا كمان بحب حماتي قوي وهي بمثابة ام لي وصديقة ونديمة لا امل من مجالستها ربنا يديم المعروف بينكم ويرجع الوالد لابنائه بالسلامة
انا اتونست قوي بتدوينك عن اولادك ربنا يخليهم ويبارك فيهم وبفرح قلبك برؤيتهم على الدوام
زيانور

و القادم....أجمل يقول...

صح و الله
لازم نربي نفسنا الأول
و نكون على استعداد نجاوب
على أسئلتهم في كل وقت

ربنا يعينك يا جميل

:)

موناليزا يقول...

صح والله ربنا يكون فى عون اولياء الامور ويقدرهم على تربية اولادهم والقدرة على مجاراتهم فى المناقشة

الفقيرة إلى الله أم البنات يقول...

أظنك فكرتى انك بعهد كده متتدخليش فى نقاش انت مش قده
والله اسئلتهم محرجه..وردرودهم علينا ..اكثر إحراج
بارك الله فيهم وجعلهم من الصالحين